N.Paşinyan İ.Əliyevlə görüşünün məzmununu açıqlayıb

Bakı/28.09.18/Turan: Ermənistanın baş naziri Nikol Paşinyan və Azərbaycan prezidenti İlham Əliyev qonşu ölkələrin ikitərəfli münasibətlərində üç məqamı müzakirə ediblər. Bu barədə, "Sputnik-Armeniya"nın məlumatına görə, Paşinyan Facebook sosial şəbəkəsində canlı efirdə bilirib.

Onun sözlərinə görə, Rusiya prezidenti Vladimir Putinin onları Futbol üzrə Dünya Çempionatı zamanı tanış etməsinə baxmayaraq, həmin vaxt Ermənistan və Azərbaycan liderləri Moskvada söhbət edə bilməmişdi.

"Ermənistan və Azərbaycan müdafiə nazirləri sərhəddə insidentlərin qarşısını almaq üçün razılaşmalıdırlar", deyə Paşinyan birinci bəndi qeyd edib.

Ermənistan hökumət başçısı qeyd edib ki, görüşdən sonra dərhal Bako Saakyana (Dağlıq Qarabağda separatçı rejimin rəhbəri) bu razılaşma haqqında bildirib. Onun sözlərinə görə, Ermənistan-Azərbaycan sərhədində və Qarabağ münaqişəsi zonasında istənilən hadisələrin qarşısı alınmalıdır.

"Bu gecə dörd ayda ilk dəfə olaraq sərhəddə heç bir hadisə qeydə alınmayıb. Bu, baş nazir olduğum dövr ərzində ilk sakit gecə idi", deyə Paşinyan qeyd edib.

İkinci bənd olaraq Ermənistan baş naziri və Azərbaycan prezidenti dialoqa və danışıqlara sadiq olmaq barədə razılığa gəliblər. Hər ikisi Qarabağ münaqişəsinin dinc yolu ilə həllinin əhəmiyyətini qeyd ediblər.

"Verdiyimiz üçüncü mühüm qərar aramızda operativ əlaqənin təşkili oldu. Biz bunu ölkələrimizdə müvafiq orqanlara həvalə edəcəyik", deyə Paşinyan qeyd edib.

Onun sözlərinə görə, atəşkəs rejiminin unudulmaması üçün bu əlaqəyə malik olmaq çox vacibdir.

Bu zaman baş nazir qeyd edib ki, predmet üzrə danışıqlar olmayıb, baxmayaraq ki, iki ölkə lideri sentyabrın 27-də axşam və 28-də də söhbət ediblər.

"Bizim üçün əsas problem atəşkəs rejiminin pozulması hallarının qarşısının alınması idi... Məzmun üzrə müzakirələr olmayıb. Hazırki mərhələdə yalnız gərginliyin azaldılması müzakirə olunub. Nizamlama haqqında danışırıqsa, aydındır ki, müvafiq atmosferə ehtiyac var. Atəş açılarkən nizamlanma haqqında danışmaq məntiqsizdir... Düzünü desəm, şadam ki, onunla razılığa gələ bildik", deyə Paşinyan qeyd edib.

Bir müddət əvvəl Paşinyan Dağlıq Qarabağ ermənilərinin danışıqlar prosesinə qoşulmasında israr edirdi. Amma bu, Bakı tərəfindən rədd edildi və beynəlxalq vasitəçilər tərəfindən dəstək tapmadı. İndi, Paşinyanın ifadə etdiyi mövqedən göründüyü kimi, Yerevan artıq formalaşmış formatda danışıqları davam etdirməyə hazırdır.

Rəsmi Bakı hələlik Azərbaycan və Ermənistan liderlərinin Düşənbə görüşün şərh etməyib. -06D-