OCCRP ittiham edir, hakimiyyət təkzib edir

Bakı/05.09.17/Turan: Azərbaycan hakimiyyəti 2012-ci ildən 2014-cü ilə qədər Böyük Britaniyada saxta şirkətlər vasitəsilə 3 mlrd. dollara yaxın vəsaiti "yuyub", bu barədə Korrupsiya və Mütəşəkkil Cinayətkarlığın Araşdırılması üzrə Mərkəzin (OCCRP) araşdırmasında deyilir. İddia olunur ki, sonradan bu pullar "bahalı əşyalara" və Avropa İttifaqında Azərbaycanın maraqlarını təşviq edən və ölkədə insan hüquqlarının pozulmasını pisləyən qətnamələrin qəbuluna mane olan Avropa siyasətçilərinə rüşvət verilməsinə xərclənib.

Xüsusən, tədqiqatçıların məlumatına görə, Azərbaycan hakimiyyətinin alman siyasətçi Eduard Lintneri (AŞPA Monitorinq Komitəsinin keçmiş rəhbəri), Bolqarıstanlı siyasətçi İrina Bokovanı (YUNESKO-nun keçmiş baş direktoru) və İtaliyalı siyasətçi Luka Volonteni (AŞPA-nın keçmiş vitse-prezidenti) öz tərəflərinə çəkdikləri ehtimal olunur. Lintner 2013-cü ildə Azərbaycanda prezident seçkilərində Almaniyadan olan nümayəndələr komissiyasının rəhbəri olub, Bokova elə həmin il "Azərbaycan - tolerantlıq məkanı" adlı fotosərgi keçirib, Volonte, öz növbəsində, Avropa Şurası Parlament Assambleyasının Azərbaycanda siyasi məhbuslar haqqında qətnaməsinin qəbul edilməsinə yol verməmək üçün pul alıb, deyə "Azadlıq radiosu" məlumat verir.

OCCRP-də iddia edirlər ki, Azərbaycan hakimiyyətinin saxta Britaniya Şirkətlərinin hesablarına köçürdüyü vəsaitin böyük hissəsi Azərbaycan banklarına, o cümlədən dövlət bankı olan International Bank of Azerbaijan-a məxsus idi. Bundan başqa, 2012-ci ildə Rusiyanın "Rosoboroneksport" dövlət şirkəti "Azərbaycandan uydurma şəxsin adına" 29 milyon dollar köçürüb. İki milyon dollar, çox güman ki, rüşvətə gedib, qalan məbləğin Azərbaycanın yüksək vəzifəli məmurları, o cümlədən ölkə prezidenti İlham Əliyevlə bağlı qurumlara çatıb.

Öz növbəsində, Azərbaycan hakimiyyəti araşdırmada ölkə rəhbərliyinin ünvanına səslənən ittihamları qətiyyətlə təkzib edib.

Nə Azərbaycan Respublikasının Prezidenti, nə də onun ailə üzvlərinin Korrupsiya və Mütəşəkkil Cinayətkarlığın Araşdırılması Mərkəzinin (OCCRP) sentyabrın 4-də hazırladığı və bir sıra KİV-lərdə dərc olunmuş hesabat layihəsində göstərilən ittihamlarla heç bir əlaqəsi yoxdur, deyə Azərbaycan dövlət başçısının mətbuat xidməti bildirib.

"Biz bilirik ki, bunların arxasında Azərbaycana və onun rəhbərliyinə qarşı beynəlxalq aləmdə dələduz, saxtakar, fırıldaqçı, yalançı imicini qazanan Corc Soros və onun əlaltıları dayanır. Bu gün Corc Sorosun çirkin əməlləri çox ciddi şəkildə araşdırılmalıdır. Onunla əlbir olan erməni lobbisi Azərbaycan Prezidentinə, onun ailəsinə qarşı çirkin kampaniya aparır. Ancaq bu səylərə baxmayaraq, bunlar heç bir nəticə verməyib. Elə "Guardian" qəzetində gedən məqalənin müəlliflərindən birinin erməni əsilli Dina Naqapetyan olması faktı da bir daha onu göstərir ki, bu çirkin ittihamlar, o cümlədən dünya erməniliyinin növbəti mənfur hərəkətidir", deyə prezidentin mətbuat xidmətinin məlumatında bildirilir. -06D-