“Ölüm alverçisi” işi yenidən gündəmdə

Bazar ertəsi ABŞ bildirib ki, rusiyalı silah alverçisi Viktor Butun Yəməndə husi yaraqlılarla sövdələşmə bağlamağa cəhd etməsi barədə xəbərləri "diqqətlə" izləyir.

"Rusiyanın uzun illər ərzində sabitliyin pozulmasında, o cümlədən silah tədarükündə iştirak etmək üçün cəlb etdiyi çox oyunçu var, təkcə Viktor But deyil.  Rusiyada həm hökumətin daxilində, həm də xaricində bu rolu yerinə yetirməyə hazır olan adam çatışmazlığı olmayıb. Və biz onları çox diqqətlə izləyirik, əks tədbirlərin görülməsi və Rusiyanın məsuliyyətə cəlb edilməsi üçün addımlar atrırıq", - Dövlət Departamentinin nümayəndəsi Metyu Miller gündəlik brifinqdə Turan-ın sualını cavablandırarkən deyib.

Bundan əvvəl Amerika KİV  bildirib ki, avqustda bəzi  husi emissarlar 10 milyon dollarlıq silah almaq barədə razılıq əldə etmək üçün Moskvaya gediblər və But ilə görüşüblər.

Rusiyanın Yaxın Şərqin işlərinə mümkün müdaxiləsilə bağlı Vaşinqtonun narahatlıq səviyyəsi barədə Turan-ın sualının cavabında Miller deyib: "Əlbəttə, biz hesab edirik ki, İran və Rusiya arasındakı əlaqələr regionda və dünyada sabitliyi pozur”.