Ombudsman İnformasiya əldə etmək haqqında Qanunun icrasını təmin etmir

Bakı/19.03.21/Turan: Azərbaycan Ombudsman Aparatı Turan agentliyinə İcbari Tibbi Sığorta üzrə Dövlət Agentliyinin idarə heyətinin sədri Zaur Əliyevə göndərilmiş informasiya sorğusuna cavab almaqda kömək etməyə hazır olduğunu bildirib.

İnformasiya sahibindən qanunla müəyyən edilmiş müddətdə informasiya sorğusuna cavab almasanız, təkrarən Ombudsman Aparatına müraciət edə bilərsiniz, deyə Ombudsman Aparatının sədri Aydın Səfixanlının 19 mart tarixli rəsmi məktubunda bildirilir.

Səfixanlı qeyd edir ki, İnformasiya əldə etmək haqqında Qanunun 12.1-ci maddəsinə əsasən, informasiya sorğusu ən qısa müddətdə, lakin 7 iş günündən gec olmayaraq icra edilir.

Turan agentliyi martın 12-dən etibarən, yəni 7 gün və ya 5 iş günüdür sorğuya cavab almağa çalışır. Amma Kütləvi informasiya vasitələri haqqında, İnformasiya azadlığı haqqında, İnformasiya əldə etmək haqqında qanunlarda açıq şəkildə qeyd edilib ki, cavab ən qısa müddətdə verilməlidir. Səfixanlı özü də bunu qeyd edir.

Məsələn, İnformasiya əldə etmək haqqında Qanunun 24.2-ci maddəsində deyilir: Bu müddətdə həmin informasiya öz operativliyini itirərsə, sorğuya dərhal, bu mümkün olmadıqda isə 24 saatdan gec olmayaraq cavab verilməlidir.

“Mən İcbari Tibbi Sığorta üzrə Dövlət Agentliyinə vətəndaş Mehman Əliyev olaraq deyil, informasiya agentliyinin direktoru olaraq, “AstraZeneka” vaksini ilə bağlı problem haqqında ictimai əhəmiyyət kəsb edən məqaləni yazmaq məqsədilə müraciət etmişəm. 7 gün keçib və mən hələ də məqaləni yaza bilməmişəm, bir halda ki, bütün dünya bu problemdən və vaksinin tətbiqinin dayandırılmasından danışır. Eyni zamanda, Azərbaycanın bu vaksinin tədarükü haqqında sazişi var. Və biz bilmirik, vaksin gətirilibmi, tətbiq edilibmi və ya ediləcəkmi?

Ombudsman Aparatının cavabını təminedici hesab etmək olmaz, belə ki, o, jurnalistlərin qanuni hüquqlarını təmin etmir. Ombudsman qanunla bağlı şərhini yenidən nəzərdən keçirməlidir və onu məmurların yöx,  vətəndaşların xeyrinə şərh etməlidir. Harada yazılıb ki, ombudsman 7 gün keçdikdən sonra müdaxilə edə bilər? Mən qanunun icra edilməməsi problemini qeyd etmişəm və bu, göz önündədir”, deyə Mehman Əliyev qeyd edib. -0-