Orduya Ermənistan silahlı qüvvələrinin ehtimal edilən təxribatlarının qarşısını almaq əmri verilib

Bakı/19.07.21/Turan: İyulun 19-da Mərkəzi Komanda Məntəqəsində Azərbaycan müdafiə naziri Zakir Həsənovun rəhbərliyi ilə xidməti müşavirə keçirilib. Bu barədə Müdafiə Nazirliyinin bu gün yaydığı məlumatda deyilir. 

Məlumata görə, müşavirəyə nazir müavinləri, qoşun növləri komandanları, nazirliyin baş idarə, idarə və xidmət rəisləri, eləcə də videobağlantı vasitəsilə azad edilmiş ərazilərdə dislokasiya olunan hərbi birlik və birləşmə komandirləri, o cümlədən digər məsul zabitlər də cəlb olunublar.

Nazir döyüş növbətçiliyinə cəlb edilən hərbi qulluqçuların sayıqlığının artırılmasını, həmçinin bölmələrin maddi-texniki təminat imkanlarının daha da genişləndirilməsini tapşırıb.

Nazir azad edilmiş ərazilərdə, Ermənistanla dövlət sərhəddində gərginliyin artmasına görə məsuliyyətin Ermənistanın üzərinə düşdüyünü bildirib: “Nazir Ermənistan silahlı qüvvələrinin ehtimal olunan təxribatlarının qarşısının alınması ilə əlaqədar komandir-rəis heyətinə göstərişlər verib”, deyə məlumatda qeyd olunur. -05D-