“Palmali” şirkətlər qrupunun rəhbəri Mübariz Mənsimov İstanbulda saxlanılıb

Bakı/15.03.20/Turan: Türkiyənin zəngin adamlarından biri, milyarder, “Palmali” nəqliyyat şirkətinin sahibi Mübariz Mənsimov bazar günü səhər İstanbulda saxlanılıb. 

Əslən Azərbaycandan olan M.Mənsimov FETO - Türkiyə hakimiyyətinin hərbi çevriliş cəhdində  günahlandırdığı din xadimi Fətulla Gülənin təşkilatına bağlılıqda ittiham olunur.

“Sabah” qəzetinin  məlumatına görə, həbs prokurorluğun maliyyə pozuntularına qarşı mübarizə şöbəsinin əməkdaşları tərəfindən həyata keçirilib. Mənbəyə görə, M.Mənsimovun ofisində axtarış aparılıb.

Türkiyə hüquq-mühafizə orqanlarının mənbələrinə görə, M.Mənsimov polis bölmələrindən birindədir və rəsmi dindirmə bazar ertəsi səhər olacaq. M.Mənsimovun konkret nədə ittiham olunduğu o zaman məlum olacaq.

Son aylarda M.Mənsimov ilə Azərbaycanın SOCAR Dövlət Şirkəti arasında münaqişə yaranıb. O, Azərbaycanda siyasi vəziyyət barədə də mənfi fikirlər söyləyib. Bundan sonra M.Mənsimov Azərbaycandakı aktivlərini itirməyə başlayıb, ya da öz Vətənində könüllü olaraq biznesini məhdudlaşdırıb.

Mübariz Qurban oğlu Mənsimov 1968-ci il martın 22-də Azərbaycanın Masallı  şəhərində anadan olub. Türkiyəli və azərbaycanlı iş adamı, “Palmali” şirkətlər qrupunun, gəmiçilik şirkətinin təsisçisi və sahibi, həmçinin “Xəzər-Lənkəran” futbol klubunun prezidentidir.

“Forbes” jurnalı Mübariz Mənsimovun sərvətini 1,3 mlrd. dollar səviyyəsində qiymətləndirərək onu dünya milyarderlər reytinqində 897-ci yerdə yerləşdirib. Türkiyədəki milyarderlər siyahısında isə 7-ci yeri tutur.

1994-1997-ci illərdə “Agent-34” agent şirkətinin ortaq sahibi, 1997-ci ildən “Palmali” şirkətlər qrupunun prezidenti və yeganə sahibidir.

* “Palmali” şirkəti əsasən neft daşınması ilə məşğul olan (ildə 105 mln. ton) 170 gəmiyə sahibdir. Şirkət Türkmənistan, Qazaxıstan, Rusiya və Azərbaycan karbohidrogen ehtiyatlarının Qərb bazarlarına daşınması ilə məşğuldur.02D-