Parisdə Azərbaycan və Ermənistan liderlərinin görüşünün təşkili mümkünlüyü müzakirə olunub

Bakı/16.01.19/Turan: ATƏT-in Minsk Qrupunun həmsədrləri - İqor Popov (Rusiya Federasiyası), Stefan Viskonti (Fransa) və Endryu Şofer (ABŞ) yanvarın 16-da Parisdə Azərbaycanın xarici işlər naziri Elmar Məmmədyarov və Ermənistanın xarici işlər naziri vəzifələrini icra edən Zöhrab Mnatsakanyan arasında məsləhətləşmələr keçiriblər.

Həmsədrlər nazirlərlə ayrı-ayrılıqda görüşüblər, daha sonra onların danışıqlarında iştirak ediblər. Bu görüşlərdə ATƏT-in hazırki sədrinin şəxsi nümayəndəsi Andjey Kasprşik də iştirak edib. Bu, iki nazirin dördüncü görüşü idi, deyə ATƏT-in Minsk Qrupu həmsədrlərinin yanvarın 16-da yaydıqları bəyanatda vurğulanır.

Fransanın Avropa və xarici işlər üzrə dövlət katibi Jan-Batist Lemuan iştirakçılarla danışıqlara yekun vurub. Həmsədrlər Yelisey sarayında qəbul ediliblər, burada onlar prezident Emmanuil Makronun aparıcı diplomatik müşavirlərinə məlumat veriblər.

İştirakçılar tərəflərin nəticələrə yönəlmiş intensiv danışıqlara imkan verən şəraiti qoruyub saxlamaq üzrə daimi səylərinə görə nazirlərə minnətdarlıqlarını bildiriblər.

Nazirlər Dağlıq Qarabağ münaqişəsinin nizamlanması ilə bağlı geniş məsələlər dairəsini müzakirə ediblər və əhalinin sülhə hazırlanması üzrə konkret tədbirlərin görülməsi zərurəti barədə razılıq əldə ediblər.

Görüşlərdə həmsədrlər nazirlərlə danışıqlar prosesinin hazırki mərhələsi üçün əsas prinsip və parametrləri nəzərdən keçiriblər.

Nazirlər və həmsədrlər danışıqların dinamikasına güclü təkan vermək üçün Azərbaycan və Ermənistan liderləri arasında mümkün sammit yolunda növbəti addımlara baxıblar.

Həmsədrlər regionun iqtisadi potensialının həyata keçirilməsinə yönəlmiş mümkün qarşılıqlı səmərəli təşəbbüslərin əhəmiyyətini qeyd ediblər.

Həmsədrlər yaxın gələcəkdə iki ölkə liderləri ilə görüşməyi planlaşdırır. -06D-