Parlament saxta xəbərlərin artmasından narahatdır

Bakı/25.05.21/Turan: Mayın 25-də parlamentin iclasında İnsan Hüquqları Komitəsinin sədri Zahid Oruc Azərbaycanın informasiya məkanında saxta xəbərlərin artdığını bildirib.

Hər gün sürətlə yayılan saxta xəbərlərin təsiri güclənir və trol orduları informasiya məkanının bir hissəsinə nəzarət edir,  Oruc deyib.

O qeyd edib ki, yerli media kütləvi oxucu axtarışında Azərbaycan və Bakı kimi müqəddəs adları süni reytinqin əsirinə çevirib ləkələyirlər: "Bir neçə başlığı Google-da axtarış verin. Görün, nə görəcəksiniz? "Azərbaycanda şok olay" başlığı 6 milyon 350 min yayılıb. Eyni hal Bakının adı ilə də yayılıb. Əlbəttə ki, bu sensasiyalar digər xəbər başlıqlarında da özünü göstərir".

Deputat vurğulayıb ki, doğru xəbərin meydanını genişləndirmək lazımdır. "Mətbuatın müstəqilliyini artırmaq və peşəkarlığını qaytarmaq üçün mediadan uzaqlaşmış yüzlərlə insanın yerini doldurmaq vacibdir. Saxta informasiya ilə mübarizə üçün yeni dövlət strategiyasına ehtiyac var. Bəli, Vətən Müharibəsində qələbə qazanmışıq, amma informasiya məkanında gündəlik, bəzən hər dəqiqə davam edən hücumlara cavab vermək lazımdır". –0--