Parlament... zoopark və ya zoosirk... əks bəyanatlar

Milli Məclisin iyirimi deputatı REAL Hərəkatının rəhbəri İlqar Məmmədovu məhkəməyə verəcəyini bildirib. Deputatlar İlqar Məmmədovun parlamenti zoopark adlandırmasına etiraz edir. 

Respublikaçı Alternativ (REAL) Hərəkatının sədri İlqar Məmmədov öz bloqunda parlamentlə bağlı belə status yazıb: “Mən Azərbaycan parlamentini bu yazı ilə təhqir edirəm. Yaxşı edirəm. Çünki Azərbaycan parlamenti böyük əksəriyyəti fırıldaq adamların toplaşdığı bir zooparkdır. Orta əsrlərdə hər şah öz yanında bir zoopark saxlayarmış, bu da o növdəndir. Milli Məclis - onun təyin olunma qaydası, onun iş prinsipləri, onun danışdığı fikirlər, onun sürdüyü maşınlar, onun mindiyi eşşəklər - hamısı Azərbaycan adlı ölkə üçün bir təhqirdir.

Özünü millətin adından danışan kimi göstərən bu zoopark, Azərbaycanda inqilab mahiyyətli dəyişikliklər nəticəsində həbs edilməlidir. Onun buraxılması haqda tələblər mənasızdır - zooparkın birini digərilə əvəz etməyin nə xeyri, əgər ikisi də şahlıq sisteminə xidmət edəcəklərsə...

Eşitdim ki, zooparkdakı bəzi ünsürlər geninə-boluna özlərini təhqirdən qorumağı xahiş ediblər şahdan. Guya bunların şahından qorxan var. Zooparksınız ki, zoopark!”

İ.Məmmədovun bu bəyanatı bir çox deputat tərəfindən tənqid, təhqir və hədə ilə qarşılanıb. 

Deputat Adil Əliyev deyib ki, belə danışmaq üçün adamın iki başı olmalıdır. “Onu da kəsib atarlar”.

Deputatlar Hadı Rəcəbli, Fazil Mustafa və digərləri İlqar Məmmədova tənqid dolu cavab qaytarıb. 

REAL-ın rəhbəri noyabrın 6-da Turan-a deyib ki, deputatların məhkəməyə müraciət etməsi barədə məlumata malik deyil. “Bu barədə yalnız mətbuatdan oxumuşam. Ancaq hər-hansı məhkəmədəm mənə bununla bağlı məlumat verilməyib”.   

Politoloq Zərdüşt Əlizadə isə bugünki mediada İlqar Məmmədovun mövqeyi ilə razılaşmadığını bildirib. Z.Əlizadə “Bizim Yol” qəzetinə deyib ki, parlament zoosirkdir. “Milli Məclis zoopark deyil, zoosirkdir. Çünki zooparkda heyvanlar bağlı volyerlərdə bir qədər sərbəst hərəkət edir. Zoosirkdə isə onlar əhilləşdirilirlər və müəyyən hərəkətlərə məcbur edilirlər və ya təşviq edilirlər...”. -03B-