Parlamentdə iki dövlət bayramının adının dəyişdirilməsilə bağlı müzakirələr başlayıb

Bakı/11.10.21/Turan: Milli Məclisin oktyabrın 11-də keçirilən plenar iclasında iki məsələyə baxılır. Bu barədə parlamentdən bildiriblər.  

Məlumata görə, iclasda “Müstəqillik Günü haqqında” Azərbaycan Respublikası qanununun layihəsi birinci oxunuşda deputatların müzakirəsinə çıxarılır.

Qanun layihəsində qeyd edilir ki, 2021-ci il oktyabrın 18-də Azarbaycan Respublikasinin müstəqilliyinin bərpa edilməsinin 30 ili tamam olur. Bu baxımdan, dövlətçilik tarixində müstəsna əhəmiyyətli mərhələlərin, xüsusən, müstəqilliyin əldə edilməsi va bərpası kimi tarixi günlərin onların mahiyyəti və məzmununa uyğun daha dəqiq ifadə olunması önəm kəsb edir.

Xatırladaq ki, “Müstəqillik Günü haqqında” qanun layihəsi bu günlərdə milli siyasət və dövlət quruculuğu komitəsində müzakirə edilib. Qanun layihəsində “28 may Respublika Günü” bayramının “Müsətqillik Günü”, 18 Oktyabr “Dövlət Müstəqilliyi Günü”nün “Müstəqilliyin Bərpası Günü” adlandırılması təklif edilir. Layihədə 28 may “Müstəqillik Günü”nün qeyri iş-günü, 18 Oktyabr  “Müstəqilliyin Bərpası Günü”nün isə iş günü hesab olunması tövsiyə olunur.

Parlementin 11 oktyabr, 12 oktyabr və 15 oktyabr tarixli plenar iclası bu məsələyə həsr ediləcək. -05B-