Parlamentin deputatı Rüstəm İbrahimbəyovun "linç edilməsini" yolverilən hesab edir

Bakı/25.05.18/Turan: Azərbaycanda "Qafqaz triosu" filmini çəkməklə, milli maraqları satmaqda ittiham olunan məşhur kinodramaturq Rüstəm İbrahimbəyova qarayaxma kampaniyası davam etdirilir.

Kampaniyanın davam etdiyi üç gün ərzində müxtəlif çağırışlar, o cümlədən İbrahimbəyovun bütün mükafat və adlardan, vətəndaşlıqdan məhrum edilməsi, məsuliyyətə cəlb edilməsi və s. haqqında çağırışlar səslənib.

Parlamentin deputatları, ictimai xadimlər, İbrahimbəyovun keçmiş həmkarları və hökumətyönlü fəallar məşhur dramaturqun cəzalandırılması və məzəmmət olunması formaları uydurmaqda yarışırlar.

Bu günlər ərzində İbrahimbəyovu Xocalı qurbanlarının xatirəsini unutmaqda və təhqir etməkdə, ermənilərə işləməkə, Azərbaycanın düşmənləri tərəfindən maliyyələşdirilməkdə və ölkəsinə və xalqına qarşı kin bəsləməkdə ittiham ediblər. Hətta dramaturqu "Asala"nın (ermənilərin terror təşkilatı) cinayətkar fəaliyyətini davam etdirməkdə ittiham edən xadim də olub.

Görünür, bu xadimlərin fantaziyası sərhəd tanımır, elə mənəvi keyfiyyətləri də.

Amma mayın 25-də "Novosti-Azerbaydjan" agentliyinə müsahibəsində deputat Fəzail Mustafa belə deyib:

"Rüstəm İbrahimbəyovun etdiklərinin siyasi motivi var. Onun məqsədi azərbaycanlıları ermənilər qarşısında alçaltmaqdır".

"Yazıçı öz əsərlərinə görə tənqidə, hücumlara məruz qala bilər. Əlbəttə, bəlkə də o, yanlış şərh edilib, yanlış anlaşılıb. Amma yazıçının bədii əsərlərinin qərəzli siyasi kontekst ehtiva etməsi alqışlanmır. Yenə deyirəm, istənilən başqa əsərdə mənfi azərbaycanlı obrazı təsvir etmək olar, amma bu, ermənilərlə müqayisə kontekstində edilirsə, bunun kənardan sifariş olduğu dərhal aydın olur. Buna görə bu cür insanlar ictimai qınaq, linç edilmə (bizim tərəfimizdən altı çizilib - red.) vasitəsilə ciddi şəkildə cəzalandırılır.

Parlamentin üzvünün "linç edilmə" sözünün mənasını anladığını və dərk etdiyini ehtimal etmək lazımdır.

Amma o, "linç" sözünün mənasını anlamırsa belə, baş verənlər ölkədə ideologiyanın səviyyəsini və vəziyyətini göstərir. Hakimiyyətin ideoloji siyasətinin bəhrələri vaxtaşırı yazıçının qulağını kəsmək, kitablarını yandırmaq, indi isə həm də linç etmək kimi çağırışlarda özünü göstərir. -02D-