Paşinyan Putinlə Laçını müzakirə edib

Bakı/27.11.20/Turan: Noyabrın 26-da Ermənistan baş naziri Nikol Paşinyanın Rusiya prezidenti Vladimir Putinlə bir saat ərzində iki telefon söhbəti baş tutub. Paşinyanın öz Facebook səhifəsində yazdığına görə, "Laçın dəhlizindəki yaşayış məntəqələri, həlak olanların cəsədlərinin, itkin düşənlərin axtarışı əməliyyatları, əsirlərin dəyişdirilməsi, sülhməramlıların yerləşdirilməsi və iştirak zonalarının müəyyən edilməsi, habelə regionun nəqliyyat kommunikasiyalarının açılması ilə bağlı məsələlər diqqət mərkəzində olub".

"Bu cür müzakirələr müntəzəm olaraq, gündə bir neçə dəfə aparılır. Biz bu müzakirələrin işgüzar xarakterli olmasını və sıxlığını nəzərə alaraq, onlar haqqında heç də həmişə məlumat yaymırıq", deyə Paşinyan yazıb.

Amma Kremlin saytında bu barədə heç bir məlumat yoxdur.

Xatırladaq ki, Ermənistan tərəfi Laçını dekabrın 1-də azad etməlidir. Amma ermənilər söhbətin rayon mərkəzinin deyil, rayonun azad edilməsindən getdiyi barədə məsələni getdikcə daha çox qadırırlar. Bu zaman Laçın rayon mərkəzində erməni polisinin qalacağı, asayişə nəzarət edəcəyi iddia olunur. Amma 10 noyabr tarixli üçtərəfli sazişdə belə bir şey deyilmir.

Laçın dəhlizindəki yaşayış məntəqələrinə gəlincə, onların əksəriyyəti Azərbaycanlılara aiddir və oraya yerli sakinlər qayıtmalıdır. 1992-ci ildə işğaldan sonra bütün bu məntəqələrə ermənilər məskunlaşıb və indi oraya məhz Azərbaycanlı əhalinin qayıtması məsələsi gündəmə gəlir.

Sülhməramlılarla bağlı Ermənistan tərəfi həmişə onların iştirak və səlahiyyət zonasının genişləndirilməsinə nail olmağa çalışır. Xüsusən, ermənilər bütün xristian obyektlərinin və tarixi obyektlərin yanında sülhməramlıları yerləşdirməyə çalışırlar, Azərbaycanlıların onları məhv etmək istədiyini iddia edirlər. Ermənilər həmçinin bu obyektlərin ermənilərə aid olması ilə bağlı iddialarının təkzib ediləcəyini başa düşdükləri üçün Azərbaycan hakimiyyətini və alimlərini bu obyektlərə buraxmamağa çalışırlar. -02D-