Media-icmal 27.11.20

Fransa Senatının qəbul etiyi 25 noyabr qətnaməsinə baxış, iqtisadçıların Kəlbəcərin iqtisadi əhəmiyyəti haqda fikirləri, Azərbaycana diplomatiyasının Avropadakı fəaliyyətinin dəyərləndirilməsi, tikinti materiallarının bahalaşa bilməsi mümkünlüyü və s. məsələlər medianın aparıcı mövzuları sırasındadır...

"Azərbaycan" qəzeti  "Fransa haqsızlığın və işğalçının yanındadır" sərlövhəli məqalədə Fransa senatının noyabrın 25-də “Dağlıq Qarabağ Respublikası"nın tanınması ilə bağlı qəbul etdiyi qərarı dəyərləndirir.

Məqalədə vurğulanır ki, 44 gün davam edən İkinci Qarabağ Müharibəsinin yekunu olaraq Azərbaycan 30 ilə yaxın işğal altında olan torpaqlarını erməni işğalından azad etdi. 

Amma Azərbaycanın ərazi bütövlüyünü təmin etməsi Fransa siyasi dairələrinin xoşuna gəlməyib, bu ölkə Qarabağ münaqişəsini tənzimləməli olan

ATƏT-in Mİnsk Qrupunun həmsədrlərindən biri kimi bitərəfliyini qorumayıb, ermənipərəst mövqeyini açıq şəkildə büruzə verib.

Bu il noyabrın 25-də Fransa Senatının "Dağlıq Qarabağ Respublikasının tanınması zərurəti" adlı qətnaməni qəbul etməsini isə müəllif beynəlxalq hüquqa hörmətsizlik kimi dəyərləndirir.

Məqalədə deyilir ki, qətnamənin mətnindən görünür ki, onun müəlliflərinin Azərbaycan və Türkiyənin güclənməsindən, birlik nümayiş etdirməsindən ciddi narahatdır, bu mənada sənəddə Türkiyəinin adı daha çox hallanır.

Müəllif hesab edir ki, bu, həm də son illərdə Türkiyənin dünya arenasında ciddi nüfuz qazanmasına bəzi Avropa ölkələrinin, o cümlədən Fransanın qısqanclıqla yanaşması deməkdir.

Azərbaycan Milli Məclisi isə bu qətnamə ilə bağlı Fransaya etiraz bəyənatı göndərib, orada deyilir ki, Fransa Senatının müstəqilliyini tanımaq istədiyi "oyuncaq qurum" noyabrın 10-da ləğv edilib, Senatın qəbul etdiyi qərəzli qətnaməyə etiraz bəyanatı qəbul olunub.

Məqalədə vurğulanr ki, bu qətnamə Azərbaycan üçün tamamilə mənasız və əhəmiyyətsizdir, amma Fransa göstərdi ki, haqsızlığın və işğalçının yanındadır, Senat isə bir daha sübut etdi ki, erməni lobbisinin əsiridir.

"Metbuat.az" saytı 27 il sonra azad edilən Kəlbəcər niyə əhəmiyyətlidir? – şərh" sərlövhəli məqalədə Kəlbəcər rayonunun erməni işğalından azad edilməsinin strateji, siyasi və iqtisadi cəhətləri müzakirə edilir.

AMEA Qafqazşünaslıq İnstitutunun Qafqaz siyasəti şöbəsinin müdiri, tarix üzrə fəlsəfə doktoru Elnur Kəlbizadənin sözlərinə görə, tarixi-coğrafi baxımdan Kəlbəcər hər zaman Azərbaycan ərazisində formalaşmış dövlətlərə bağlı olaraq bu ərazi Qarabağ-Gəncə-İrəvan üçbucağında körpü rolunu oynamışdır.

Şöbə müdirinin fikrincə, Kəlbəcərin işğaldan azad olunması strateji, siyasi və iqtisadi baxımdan qələbədir.

E.Kəlbizadə müasir dünyada dövlətlərin su ehtiyatları uğrunda da amansız mübarizə apardıqlarını deyərək, bu baxımdan Kəlbəcərin həm şirin, həm də mineral su ehtiyatları ilə zəngin olmasına diqqət çəkir.

Tərtərçay, Bazarçay, Xaçınçay, Böyük və Kiçik Alagöllərin Azərbaycanın nəzarətinə qaytarılması su ehtiyatları məsələsində xeyli yeni imkanlar açır.

Şöbə müdirinə görə, Kəlbəcərdə yaylaqların çoxluğu heyvandarlığın inkişafında əhəmiyyətli rol oynaya, keçmiş şöhrətini özünə qaytara bilər, üstəlik bu rayon Qafqazın əsas turizm mərkəzlərindən birinə çevrilə bilər. 

"Azpolitika.info" saytı isə Azərbaycan diplomatiyasının Fransa uğursuzuğu - səfirliklərimizdə "Elmar Məmmədyarov ab-havası" nə vaxt dağılacaq?" sərlövhəli məqalədə ölkə diplomatlarının bəhs edilən istiqamət üzrə fəaliyyətindən narazılıq ifadə olunur.

Müəllif bu iddianı Fransa senatının bu il noyabrın 25-də "Dağlıq Qarabağ Respublikası"nın tanınması iə bağlı 306 səslə qəbul etdiyi qərarla əsaslandırır və bu fakta görə, Azərbaycan diplomatik korpusunun Avropadakı fəaliyyətinin xeyli suallar yaratdığını vurğulayır.

Müəllifə görə, Fransanın ermənipərəst olması yeni məsələ deyil, amma bu siyasətin Azərbaycan üçün xoşagəlməz nəticələr yaratmasında diplomatik korpusun günahının olmadığını söyləmək doğru omazdı.  

"Azərbaycan əleyhinə belə bir həmrəyliyin yaranması (Senatdakı səsvermənin nəticəsi nəzərdə tutulur - red.) isə diplomatiyamızın, xüsusilə Fransadakı səfirliyimizin ciddi uğursuzluğudur", deyə müəllif  gəldiyi nəticəni bəyan edir. 

Müəllifin fikrincə, bütünlükdə diplomatiya sahəsində görüləcək işlər çoxdur, kadr məsələlərində radikal dəyişikliklərə ehtiyac var: "Çünk  xüsusilə də Qərb ölkələrindəki səfirliklərimizdə "Elmar Məmmədyarov ab-havasının" hələ də güclü olduğu qənaəti mövcuddur".

"Müsavat.com" saytı isə "Tikinti materialları bahalaşa bilərmi? - mütəxəssis rəyi" sərlövhəli məqalədə verilən suala cavab axtarılır.

Müəllif deyir ki, 44 günlük İkinci Qarabağ Müharibəsindən sonra işğaldan azad olunan əraziləridə quruculuq və bərpa işləri başlayır. 

Bundan irəli gələrək, müəllif iqtisadçı-ekspertlərə yeni binaların tikliməsinin, şəhərlərin qurulmasının tikinti bazarına necə təsir göstərəcəyi sualı ilə müraciət edir.

Tikinti materiallarının qiymətlərinin bahalaşa bilməsi müəllifin diqqət mərkəzindədir. 

İqtisadçı-ekspert Natiq Cəfərli deyir ki, quruculuq işlərinin davam edəcəyi yaxın illərdə həm infrastruktur layihələri, həm də vətəndaşların özlərinin tikinti aparmaları imkanları genişlənəcək.

O hesab edir ki, bununla da tikinti materialları bazarında tələbin yüksəlməsi gözlənilir və qiymətlərin artmasına təəccüblənmək lazım deyil, artıq indidən həm stimullaşdırıcı, həm də istehsalın artımına səbəb olacaq addımları atmaq lazımdır.

"Təbii ki, idxal malları ilə də bağlı müəyyən güzəştlər tətbiq edilməlidir ki, bazarda qiymətlərin sürətlə artmasının qarşısı alınsın".