Paşinyan: “Qarabağın xaricdən idarə olunan elitası regionun itirilməsində günahkardır”

Dağlıq Qarabağın keçmiş liderləri Rusiyanın əlində marionetka idilər və məhz buna görə ermənilər Qarabağı itirdilər. Bu barədə Ermənistanın baş naziri Nikol Paşinyan ölkə parlamentində çıxışı zamanı bildirib, Ermənistan KİV məlumat yayıb.

«Ermənistanın hazırkı hökuməti Dağlıq Qarabağın statusu məsələsini beynəlxalq normalara uyğun həll etmək üçün hər şeyi etdi, lakin Dağlıq Qarabağ və Ermənistanın xarici təsir və göstərişlərə malik klerikal-feodal elitası bunun baş verməməsi üçün hər şeyi etdi. Kulminasiya nöqtəsi bu elitanın da bayram etdiyi kimi, Dağlıq Qarabağ prezidenti Araik Arutyunyanın istefaya məcbur edilməsi oldu. Az sonra ermənilər Qarabağdan mühacirət etməyə məcbur oldular", - o deyib.

Onun sözlərinə görə, hətta 2023-cü ilin sentyabrında Ermənistan hökuməti öz mövqeyindən əl çəkmədi, ancaq bundan ötrü ermənilər Qarabağda qalmalıydılar.

"Lakin Dağlıq Qarabağ və Ermənistanın klerikal -feodal elitası Kollektiv Təhlükəsizlik Müqaviləsi Təşkilatından olan havadarları ilə birlikdə Qarabağ məsələsini bağladı və bunun erməni məsələsini bağlamağa, Ermənistanda marionet  hökumət qurmağa və Ermənistanın müstəqilliyinə son qoymağa kömək edəcəyinə ümid etdi.  Bu, işə yaramadı və işləməyəcək", - o bildirib.

O qeyd edib ki, hökumət Ermənistanda sabitliyin pozulmasına yol verməyəcək. "Mən hökumətin siyasi iradəsini vurğulamaq istəyirəm ki, Dağlıq Qarabağ klerikal -feodal elitasının öz klan  məqsədləri üçün Dağlıq Qarabağ xalqından istifadə etməyə çalışmasına imkan verməyəcəyik".

Qeyd edək ki, son günlər Ermənistanda Qarabağ şəhər və qəsəbələrinin bir sıra keçmiş meri həbs edilib. Onlar Paşinyan hökumətini devirmək məqsədilə mitinqlərə və iğtişaşlara təhrik etməkdə ittiham olunurlar.