Paşinyan Qarabağla bağlı illər ərzində qazanılmış danışıqlar bazasından imtina etdiyini etiraf edib və Qarabağ ətrafındakı rayonları azad etmək istəmir

Bakı/14.10.20/Turan: Ermənistan Qarabağın müqəddəratını təyin etmə hüququna məhəl qoymayan danışıqlardan imtina edib. Bu barədə çərşənbə axşamı Ermənistanın baş naziri Nikol Paşinyan xalqa müraciətində deyib.

“Əvvəlki illərdə Qarabağ üzrə danışıqlar prosesi elə bir nöqtəyə çatıb ki, əslində erməni xalqına qarşı öz hüquqlarından imtina etmək tələbi irəli sürülüb”, deyə o bildirib.

Bakı 7 rayondan 5-ni təhvil verməyi, qalan iki rayonun təhvil verilməsi qrafikini təsdiq etməyi və Qarabağın istənilən statusunun Azərbaycanın tərkibində olacağını müəyyən etməyi tələb edirdi.

Ermənistan Qarabağın dəqiq statusu olmadan nizamlanmanın mümkün olmadığını izah etməyə çalışdıqda isə Azərbaycan istənilən ciddi müzakirəni rədd edirdi.

“Bu danışıqlar bazasını miras alan hökumətimiz məsələnin bu formada müzakirəsini qəbuledilməz hesab edərək, bundan imtina edib”, deyə o əlavə edib.

Qarabağla bağlı “Münhen sazişləri” olmamalı idi. Beynəlxalq qüvvələr və təşkilatlar baş verənlərə reaksiya vermir, “sülh müqabilində ərazi” formulunun qəbul edilə biləcəyini hesab edir. Bu, 1938-ci il Münhen sövdələşməsinə çox bənzəyir, həmin vaxt guya sülh üçün Çexoslovakiyanın əraziləri Almaniyaya verilmişdi. Bundan sonra nə baş verdiyini hamı bilir, deyə o əlavə edib.

O qeyd edib ki, Azərbaycan Dağlıq Qarabağ ermənilərinin öz müqəddəratını təyin etməklə bağlı hər hansı hüququnu qəbul etmir. -02D-