Rusiya və Fransa Ermənistana silah göndərir – Erdoğan

Ankara/14.10.20/Turan: Türkiyə Azərbaycana əlindən gəldiyi qədər kömək etməyə hazır olduğunu gizlətmir, amma niyə heç kim ATƏT-in Minsk Qrupuna daxil olan dövlətlərin Ermənistanı dəstəkləməsini sorğuya çəkmir? Yerevan Rusiya və Fransadan silah alır, amma nədənsə heç kim bu mövzunu müzakirə etmir. Bu barədə Türkiyə prezidenti Recep Tayyip Erdoğan çərşənbə günü Ankarada bildirib.

Onun sözlərinə görə, ATƏT MQ-nin həmsədri olan ölkələr yenə Ermənistan-Azərbaycan münaqişəsinin nizamlanmasını uzatmağa çalışırlar.

“Uğursuz danışıqlar 30 ildir davam edir. Azərbaycan xalqının səbr kasası daşıb. Bu gün Azərbaycan xalqı tarixi torpaqlarının işğaldan azad edilməsi uğrunda fəal mübarizə aparır. 30 il ərzində Azərbaycan torpaqlarındakı qanunsuzluqlara məhəl qoymayanlardan ədalət gözləmək mənasızdır”, deyə Erdoğan bildirib.

Onun sözlərinə görə, Türkiyənin erməni xalqına qarşı heç bir etirazı yoxdur. Bu gün Türkiyədə 100 minə yaxın Ermənistan vətəndaşı var, deyə Türkiyə lideri qeyd edib.

Türkiyənin dövlət başçısı Dağlıq Qarabağdakı döyüşlərdə Suriya müxalifətinin döyüşçülərinin iştirakı haqqında iddiaları təkzib edib. “Ankaranın belə bir planı yoxdur və heç vaxt olmayıb. Biz qardaş Azərbaycana əlimizdən gələn köməyi göstərməyə hazırıq. Suriyalı döyüşçülərə gəlincə, onların öz torpaqlarında da işi az deyil. Cənubi Qafqaza getməyinə ehtiyac yoxdur”, deyə Erdoğan bildirib. -02D-