Paşinyan və Arutyunyan etiraf edirlər ki, barışıq Qarabağı tamamilə darmadağın olmaqdan xilas etdi

Bakı/10.11.20/Turan: Qarabağa dair saziş ordunun tövsiyəsi ilə imzalanıb. Bu barədə Ermənistanın baş naziri Nikol Paşinyan Facebook-da canlı yayımda bildirib.

“Ordu deyirdi ki, dayanmaq lazımdır. Çünki bizim problemlərimiz var, onların həlli perspektivi yoxdur, ya da resurs tükənib”, - o bildirib.

“Hərbi resurs hər şeydə effektiv deyildi. Ön cəbhədə döyüşənləri əvəzləyən yox idi. Döyüşənlərin istirahət etmək imkanı olmalı idi”, - o deyib. Buna görə də Ermənistan və Qarabağ rəhbərliyi qərara aldılar ki, müharibəni mümkün qədər tez dayandırmaq lazımdır, əks halda nəticələr daha ağır olacaq, -baş nazir qeyd edib.

Öz növbəsində separatçıların lideri Arayan Arutyunyan etiraf edib ki, Qarabağda müasir silah olmayıb və təqsirkarlar buna görə cavab verməlidirlər. O, xalqa videomüraciətində deyib ki, 43 gün ərzində hərbi əməliyyatlar zamanı erməni tərəfi Füzuli, Cəbrayıl, Qubadlı, Zəngilan, Hadrut rayonunun əsas hissəsi, Martuni və Əsgəran rayonlarının bir hissəsi, ən başlıcası isə Şuşa şəhəri üzərində nəzarəti itirib. Arutyunyan bildirib ki, Şuşa üzərində nəzarət noyabrın 7-də tamamilə itirilib.

Döyüşlər Stepanakertin girəcəyində, şəhərdən 2-3 kilometr məsafədə gedirdi və əgər hərbi əməliyyatlar davam etsəydi, bir neçə gün, yaxud bir neçə həftə ərzində bütün Qarabağı itirmək olardı.

“Mən xəbərdarlıq etmişəm ki, sizə ehtiyacımız var, mən bu barədə oktyabrın 29- da Kazançesos məbədinin qarşısında demişəm, deyirdim ki, Şuşa təhlükədədir”, - Arutunyan bildirib. İndi Qarabağ rəhbərliyi siyasi qüvvələr, hərbi xadimlər, Qarabağın keçmiş rəhbərləri ilə məsləhətləşmələrə başlayıb. Arutyunyanın fikrincə, vətəndaş müharibəsi çıxış yolu deyil, birləşmək və bütün qərarları düşünmək lazımdır.-02D-