Penitensiar Xidmət Ayxan İsrafilovun döyüldüyü haqqında məlumatları təkzib edir

Penitensiar Xidmət həmkarlar ittifaqı fəalı Ayxan İsrafilova qarşı fiziki təzyiq haqqında məlumatları təkzib edib.

Fəalın anası gəncin cəzaçəkmə müəssisəsində dərmanlarının əlindən alınmasına etiraz etdiyinə görə döyüldüyünü bildirib.

Penitensiar Xidmətin İctimaiyyətlə Əlaqələr şöbəsindən Ayxan İsrafilova qarşı fiziki təzyiq haqqında iddiaları "əsassız" adlandırıblar.

"Belə ki, məhkum Ayxan İsrafilov işçi heyət və məhkumlar tərəfindən fiziki və mənəvi təzyiqlərə və işgəncələrə məruz qalmayıb. Həmçinin, A.İsrafilova qanunvericilikdə nəzərdə tutulmuş qaydada və sayda digər məhkumlar kimi ailə üzvləri ilə görüşmək, telefonla zəng etmək, sovqat qəbul etmək üçün şərait yaradılır, gündə 3 dəfə isti və keyfiyyətli qida ilə təmin edilir, hüquqları və qanuni mənafeləri qorunur", deyə İdarədən bildiriblər.

"Dərman vasitələrinin əlindən alınması ilə bağlı iddiaya cavab olaraq bildiririk ki, müəssisəyə daxil olarkən tibb-sanitariya hissəsinin həkimləri tərəfindən üzərində olan dərman vasitələri müvafiq yoxlama və təyinatı üzrə istifadə edilməsinə nəzarət məqsədilə götürülmüş, müvafiq prosedur başa çatdıqdan sonra özünə geri qaytarılıb", deyə Penitensiar Xidmətdən qeyd ediblər.

* "İşçi Masası" Həmkarlar İttifaqları Konfederasiyasının üzvü A.İsrafilov 11 avqust 2023-cü il tarixində saxlanılıb və narkotik ticarətində ittiham olunub. Sonradan o, 3 il müddətinə azadlıqdan məhrumetmə cəzasına məhkum edilib.

Hüquq müdafiəçiləri onu siyasi məhbus kimi tanıyıblar.