Pentaqon: ABŞ Ukraynaya bütün mümkün hərbi yardımı göstərəcək

Vaşinqton/05.04.22/Turan: Bu yaxınlara qədər Ukrayna paytaxtını atəşə tutan Rusiya qüvvələrinin təxminın üçdə ikisi hazırda Belarusa yerləşdirilir, bu barədə bazar ertəsi Pentaqonun yüksək vəzifəli nümayəndəsi bildirib, xəbəri Turan-ın Vaşinqtondakı müxbiri verib.

"Onlar Belarusda cəmləşdirilir, sonra isə yenidən Ukraynaya yerləşdiriləcək", deyən məmur "bu qoşunların, çox güman ki, Ukraynanın şərqinə, Donbass bölgəsinə yeridiləcəyini" qeyd edib.

"Rusların Kiyevdən çəkilməsi həvəsləndirsə də, heç kim bunu Ukraynanın qələbəsi adlandırmır. Putinin Ukraynanın seçilmiş hökumətini devirmək məqsədi baş tutmasa da, bu, Kiyevin təhlükədə olmadığını göstərmir. Paytaxt yenə raket və artilleriya atəşlərinə məruz qala bilər", deyə məmur qeyd edib.

Vaşinqton, öz növbəsində, maksimum sürətlə Ukraynanı müdafiə silahı ilə təchiz edir. 300 milyon dollar dəyərində növbəti silah partiyası maksimum qısa müddətdə Ukraynaya çatdırılacaq.

"Stinger və Javelin raketləri, pilotsuz aviasiya kompleksləri və digər müdafiə texnikası təcili surətdə Ukraynaya göndərilir. Biz bundan sonra da Ukraynanı dəstəkləyəcəyik və bunu əlimizdən gəldiyi qədər edəcəyik", deyə Pentaqonun mətbuat katibi Con Kirbi mətbuat konfransında təsdiq edib.

Kirbinin sözlərinə görə, ABŞ həmçinin öz müttəfiqləri və tərəfdaşları ilə birlikdə Ukrayna SQ-yə ölkələrinin müdafiəsi üçün bütün mümkün vasitələrin verilməsi üzərində işləməyi davam etdirir. -25B-