Pentaqon: Rusiya qrafikdən "bir neçə gün" geri qalır

Vaşinqton/30.04.22/Turan: Pentaqonun qiymətləndirməsinə görə, Rusiya logistika problemləri və Ukrayna Silahlı Qüvvələrinin müqaviməti səbəbindən Donbasdakı məqsədlərinə çatmaq üzrə qrafikdən “bir neçə gün” gec qalır, bu barədə cümə günü Müdafiə Nazirliyinin yüksək vəzifəli nümayəndəsi bildirib, Turan-ın Vaşinqton müxbiri məlumat verib.

Məmurun sözlərinə görə, Rusiya quru qoşunları Ukraynanın cənub-şərq bölgəsində "ləng və qeyri-bərabər şəkildə irəliləyir". Kreml əvvəlki taktikasına yenidən baxıb, Ukraynanın cənubunda və Şərqində yeni strateji hücuma yönəlib.

Moskva Mariupoldan qoşunları çıxarmaqla Donbasda Ukrayna qüvvələrinə şimal, şərq və cənubdan hücum etməyə çalışır, məmur deyib və əlavə edib ki, Rusiya qüvvələri bütün cəbhələrdə geridə qalır.

“Onlar daha uzaqda olmaq və düşməni mühasirəyə almaq niyyətində idilər. Amma indi onlar Ukrayna qoşunlarını mühasirəyə almaqdan uzaqdırlar. Müharibənin nəticəsini təxmin etmək çətin olsa da, ukraynalıların Donbasda effektiv müdafiəni davam etdirdikləri aydındır”, - adının çəkilməsini istəməyən məmur deyib.

Pentaqonun qiymətləndirilməsi Ağ Evin Ukrayna Silahlı Qüvvələrinə dəstək üçün 33 milyard dollar həcmində yeni miqyaslı maliyyələşdirmə sorğusunu açıqlamasından bir gün sonra ortaya çıxıb.

Müdafiə Nazirliyinin nümayəndəsi qeyd edib ki, Ukraynaya Amerika istehsalı olan 155 millimetrlik M777 haubitsaları daxil olmaqda davam edir. 90 haubitsanın 60 faizə yaxını 155 millimetrlik mərmilərlə birlikdə artıq Ukraynadadır.

"Biz inanırıq ki, bu haubitsalar Donbasdakı döyüşdə çox effektli olacaq", - məmur deyib. -0-