Polad Aslanov səhhəti pisləşdiynə görə aclıq aksiyasını dayandırıb

Xeberman.com saytının həbsdə olan rəhbəri,  Polad Aslanovun səhhəti pisləşdiynə görə noyabrın 10-da aclıq aksiyasını dayandırıb.

“Polad zəng edib dedi ki, səhhətində problemlər yarandığına görə  aclıq aksiyasını dayandırıb. O, rəisin kabinetindən zəng etmişdi. Dedi ki,  hazırda tibb hissəsində  saxlanılır. Telefon danışığı qısa olub və Poladın səhhətində yaranan problemlərin təfərrüatlarını açıqlamağa imkanı  olmayıb”, - G.Aslanova qeyd edib.

Onun sözlərinə görə, noyabrın 11-də P.Aslanovun növbəti telefon danışığı günüdür.

G.Aslanova  bildirib ki, həyat yoldaşı  zəng etməsə, onun vəziyyətini aydınlaşdırmaq üçün həbsxanaya  gedəcək.

* P.Aslanov noyabrın 4-də siyasi məhbuslara azadlıq tələbi ilə aclıq elan edib. Bundan sonra o, 1 saylı cəzaçəkmə müəssisəsindən 15 saylı cəzaçəkmə müəssisəsinə köçürülüb və karserə salınıb

** Xeberman.com saytının rəhbəri Polad Aslanov 12 iyun 2019-cu il tarixində İranın xeyrinə casusluq ittihamı ilə - CM-in 274-cü (dövlətə xəyanət) maddəsi ilə həbs edilib. O, 16 il azadlıqdan məhrumetmə cəzasına məhkum edilib.

Aslanov bütün ittihamları rədd edir, xüsusi xidmət əməkdaşları arasında korrupsiya faktlarını ifşa etdiyinə görə təqib edildiyini bildirir.

Hüquq müdafiəçiləri onu siyasi məhbus kimi tanıyıblar. Sonradan Ali Məhkəmə Aslanovun həbs müddətini 13 ilə qədər azaldıb. Avropa məhkəməsi onun həbsə alınmasını qanunsuz hesab edib və ona pul kompensasiyası təyin edib.