Polis Fərəc Kərimlini başqa adamla səhv salıb? (yenilənib)

Bakı/29.07.20/Turan: Çərşənbə günü günorta saatlarında Müsavat Partiyasının sədr müavini Fərəc Kərimli paytaxt polisindən buraxılıb. O, iyulun 14-15-də orduya dəstək mitinqində iştirak bəhanəsilə səhər tezdən evdən aparılmışdı.

Polisdə F.Kərimliyə ona bənzər bir şəxsin fotosunu göstəriblər. “Mən videoyazıya  baxmağı təklif etdim. Baxdıqdan sonra məlum oldu ki, bu, başqa adamdır. Məndən izahat aldılar və buraxdılar”, - F.Kərimli polisdən qayıtdıqdan sonra Facebook səhifəsində yazıb. –06D-

*   *   *

2020 İyul 29 (Çərşənbə) 12:37:04

Polis Müsavat Partiyası rəhbərinin müşavirini evdən aparıb

Bakı/29.07.20/Turan: İyulun 29-da səhər tezdən mülki geyimli altı nəfər Müsavat Partiyası rəhbərinin müşaviri Fərəc Kərimovun mənzilinə gələrək onu Bakı Şəhər Polis İdarəsinə aparıblar. Bu barədə Turan agentliyinə partiyanın sədri Arif Hacılı bildirib.

Gələnlər özlərini təqdim ediblər və deyiblər ki, Fərəc 14 iyul nümayişində iştirakı ilə bağlı vəziyyəti aydınlaşdırmaq üçün onlarla birlikdə getməlidir”, - A.Hacılı bildirib.

Bundan sonra Fərəc Kərimovdan və ya hüquq-mühafizə orqanlarından məlumat daxil olmayıb, - o qeyd edib.

Öz növbəsində Bakı Şəhər Baş Polis İdarəsinin mətbuat xidmətindən Turan-a bildiriblər ki, Fərəc Kərimov haqda informasiyaya malik deyillər.

Qeyd edək ki, Fərəc Kərimov keçmiş siyasi məhbusdur. 2014-cü ildə saxta narkotik maddə ittihamı ilə 6,5 il müddətinə azadlıqdan məhrum edilib. Sonradan hökm 3 ilədək azadlıqdan məhrumetməyə qədər yumşaldılıb. -03B-