Polşa prezidenti Müqəddəs Məryəm Katolik Kilsəsində olub

Polşa prezidenti Ancey Duda Azərbaycana rəsmi səfəri çərçivəsində mayın 31-də Bakıdakı Müqəddəs Məryəm Katolik Kilsəsini ziyarət edib.

Katolik Kilsəsinin Azərbaycandakı yepiskopu Vladimir Fekete kilsənin tarixi, burada katoliklərin ibadət etməsi üçün yaradılan şərait barədə Polşa prezidentinə məlumat verib.

Məlumata görə, kilsənin yerləşdiyi ərazi 2004-cü ildə Azərbaycana gələn Vatikanın nümayəndə heyətinin başçısı kardinal Toran tərəfindən Roma-katolik kilsəsinin ənənəsinə uyğun olaraq təqdis edilib.

Eyni vaxtda 250-300 nəfərin ibadət edə bilməsi üçün salon var. Kilsənin rəsmi açılışı 2008-ci ilin martında olub və Azərbaycan prezidenti İlham Əliyev, birinci xanım Mehriban Əliyeva və Vatikanın dövlət katibi kardinal Tarçizio Bertone açılış mərasimində iştirak ediblər.

V.Fekete 2008-ci ildə Heydər Əliyev Fondu tərəfindən Müqəddəs Ruhun həvarilərə nazil olmasını təsvir edən klassik vitraj və Müqəddəs Rozariyanın dualarındakı sirlərdən bəhs edən keramik pannonun kilsəyə hədiyyə olunması barədə Polşanın dövlət başçısına məlumat verib.

Sonra Polşa prezidenti Azərbaycan-Vatikan əlaqələrini, həmçinin Roma Papası II İohan Pavelin Azərbaycana səfərini əks etdirən fotoguşəyə baxıb. Onun diqqətinə çatdırılıb ki, Roma papaları II İohan Pavel və Fransisk müvafiq olaraq 2002-ci və 2016-cı illərdə Bakıya səfər ediblər.

Xatırladaq ki, Polşa prezidenti mayın 31-də Azərbaycana səfərə gəlib. Qarşılanma mərasimi, təkbətək və geniş tərkibli görüşlər olub, prezidentlər mətbuata bəyanatlarla çıxış ediblər, bir sıra sənədlər imzalanıb, Azərbaycan-Polşa biznes forumu keçirilib.--0--