Prezident İlham Əliyev ABŞ ilə strateji tərəfdaşlığa sadiq olduğunu bildirir

Azərbaycan regionda ABŞ üçün mühüm ölkədir və Bakı ilə Vaşinqton arasında strateji tərəfdaşlıq bundan sonra da möhkəmlənəcək. Çərşənbə günü Heydər Əliyev Mərkəzində açılan “Gələcəyə baxış” ikigünlük  ABŞ-Azərbaycan forumunun leytmotivi belədir.

Forumda 42 ştatı təmsil edən böyük nümayəndə heyəti iştirak edir. Nümayəndə heyətinə hazırkı və keçmiş senatorlar, konqresmenlər, keçmiş yüksək vəzifəli məmurlar, o cümlədən keçmiş nazirlər, tanınmış ekspertlər daxildir.

Forumda giriş sözü ilə Azərbaycan prezidenti İlham Əliyev iştirak edib. O, iki ölkə arasında siyasi münasibətlərin və dialoqun yüksək səviyyədə olduğunu qeyd edib.

ABŞ şirkətləri Azərbaycan iqtisadiyyatına böyük investisiyalar qoyublar. Bundan əlavə, ABŞ və Azərbaycan qlobal və regional təhlükəsizlik, terrorizmə qarşı mübarizə, enerji sahəsində sıx əməkdaşlıq edirlər. Əfqanıstanda beynəlxalq əməliyyatın təminatı üçün yüklərin 40%-i Azərbaycan vasitəsilə daşınır.

ABŞ həmçinin  ATƏT-in Minsk Qrupunun həmsədri kimi Dağlıq Qarabağ münaqişəsinin nizamlanmasında mühüm rol oynayır. İ.Əliyev ümidvar olduğunu bildirib ki, münaqişə ATƏT-in Minsk Qrupu çərçivəsində həll olunacaq.

Enerji əməkdaşlığına toxunan İ. Əliyev “Cənub qaz dəhlizi”nin həyata keçirilməsində Azərbaycanın fəal iştirakını qeyd edib. Avropanın enerji təhlükəsizliyinin təminatı üçün   mühüm olan bu layihə ABŞ tərəfindən də dəstəklənir.

Prezident qeyd edib ki, NATO və Aİ ilə əməkdaşlıq Azərbaycanın siyasətinin prioritetidir. 

İ.Əliyev deyib ki, öz prezidentliyi dövründə ABŞ-Azərbaycan əlaqələrinin inkişafı üçün çox işlər görüb və forum əməkdaşlığın gələcək perspektivlərini müəyyən edəcək.

Demək olar ki, Azərbaycan XİN rəhbəri Elmar Məmmədyarov da bu cür çıxış edib.

Amerikalı iştirakçılar regionda ABŞ-ın siyasəti baxımından Azərbaycanın əhəmiyyətini qeyd ediblər, Bakının qlobal təhlükəsizlik və enerji məsələlərinə töhfəsini vurğulayıblar.

Nyu Yorkdan konqresmen Qreqori Miks qeyd edib ki, nümayəndə heyətinin tərkibində həm Respublikaçı, həm də Demokrat partiyalarının nümayəndələri var. Bu, hər iki partiyanın Azərbaycana dair mövqeyinin üst-üstə düşməsindən xəbər verir.

O qeyd edib ki, ABŞ demokratik inkişaf üçün nümunə ola bilər. Miksin fikrincə, silahlanmaya deyil, təhsilə, əhalinin rifahına vəsait qoymaq lazımdır, belə ki, bu demokratiya və sabitliyin rəhnidir.

ABŞ səfiri Riçard Morninqstar Kosovo, İraq və Əfqanıstanda beynəlxalq əməliyyatlarda Azərbaycanın töhfəsini qeyd edib, həmçinin ABŞ-ın Azərbaycanda demokratik islahatları dəstəklədiyini bəyan edib. 

Forum çərçivəsində aşağıdakı mövzular müzakirə olunacaq:

- “ABŞ - Azərbaycan strateji tərəfdaşlıq: Azərbaycana qarşı ABŞ-ın siyasəti”

-  "Xəzər regionu və Avropanın enerji təhlükəsizliyi: dünyanın enerji təhlükəsizliyi dinamikasının dəyişdirilməsi: Cənub enerji dəhlizi üçün yeni imkanlar"

- “Şərq və Qərb arasında Azərbaycan”

- “Avrasiya təhlükəsizlik və əməkdaşlıq: Azərbaycanın regional sülh və sabitlikdə rolu".

  Yekun iclas "ABŞ və Azərbaycan arasında strateji tərəfdaşlıq: növbəti addımlar" mövzusuna həsr olunacaq.

Qeyd edək ki, Amerika nümayəndə heyəti mayın 24-dən Bakıdadır  və qonaqpərvər ev sahibləri böyük mədəni proqram təşkil ediblər. Proqrama “7 gözəl” baletinə tamaşa, tarixi yerləyə səyahət, banketlər daxildir.—03C06--