Prezident İlham Əliyev Avropa Parlamentindən narazıdır

  Azərbaycan əleyhinə qətnamələrlə əlaqədar ölkə Avropa parlamenti ilə əlaqələrini dayandırıb. Bunu prezident İlham Əliyev cümə axşamı Avropa Parlamentində liberal-demokratlardan ibarət fraksiya - ALDE qrupun vitse-sədri, “Şərq Tərəfdaşlığı” proqramının Azərbaycan üzrə məruzəçisi Norika Nikolai və Avropa Parlamentinin üzvü İveta Qriqule ilə görüşündə bildirib.

“Təhqirlərlə dolu və tamamilə əsassız olan həmin qətnamələrin qəbul edilməsi ölkəmizin bu qurumla əlaqələrinin kəsilməsinə səbəb olub. Hazırda Avropa Parlamenti ilə ölkəmizin hər hansı əlaqəsi mövcud deyil və bu, Azərbaycanın günahı ucbatından baş verməyib. Ölkəmiz yalnız öz haqlı mövqeyini müdafiə edib”, - dövlət başçısı vurğulayıb.

O deyib ki, prezidenti və vitse-prezidenti anti-Azərbaycan qüvvələrinin bir hissəsini təşkil edir.  Onların təhqiramiz bəyanatları, hücumlar və böhtanlar Azərbaycanın Avropa Parlamenti ilə əlaqələrinin perspektivlərini sual altına qoyub.

Görüş barədə rəsmi məlumatda İ.Əliyevin danışdığı qətnamalərin adları açıqlanmır. Həmçinin o, konkret ad çəkmir. Lakin şübhə yoxdur ki, söhbət ötən ilin payızında qəbul edilmiş bir neçə qətnamədən gedir. Həmin qətnamələrdə Azərbaycan hakimiyyətinə qarşı sanksiyalara çağırış edilir, vətəndaşların hüquq və azadlıqlarının pozulmasına son qoyulması tələb olunur.

Avropa Parlamentinin rəhbəri Martin Şults  da həmin qətnamələri dəstəkləyərək vətəndaş fəallarının təqib olunmasına və həbsinə son qoyulmasını tələb edib. 

Qeyd edək ki, beş il öncə Avropa Parlamenti Qarabağ münaqişəsilə bağlı Azərbaycanın mövqeyini dəstəkləyən qətnaməni qəbul edəndə Bakı bunu “ədalətli qiymətləndirmə” adlandıraraq Avropa Parlamentinin “prinsipial mövqeyini” alqışlamışdı.-02D-