Azərbaycan hakimiyyəti və vətəndaş cəmiyyəti arasında dialoq mümkündürmü?

Cümə axşamı Avropa Şurası və Avropa İttifaqının “Vətəndaş cəmiyyəti dialoqu” yeni  birgə layihəsinin təqdimatı olub.

Prezidentin ictimai- siyasi məsələlər üzrə köməkçisi Əli Həsənov öz çıxışında QHT-lərin fəaliyyəti üçün bütün şəraitin yaradıldığını bildirib.

 Eyni zamanda o, Azərbaycan qanunvericiliyinin sərtləşdirilməsi barədə tənqidləri qəbul etməyib.

“İctimai sektorun və beynəlxalq təşkilatların bəzi nümayəndələri son illərdə qanunvericiliyə dəyişiklikləri tənqid edirlər və bildirirlər ki, bu, QHT-lərin inkişafına mane olur. Əslində bu dəyişikliklər şəffaflığın artırılması, QHT-lər və dövlət arasında əlaqələrin sadələşdirilməsi üçün edilib”, - Ə.Həsənov deyib.

 Nüfuzlu beynəlxalq donorların ölkədən  çıxarılması barədə iradlara toxunan Ə. Həsənov deyib ki, indi “QHT-lər üçün ən əhəmiyyətli donor Azərbaycan hökuməti özüdür”.

Son 3,5 il ərzində QHT-lərə Dövlət Dəstəyi Şurası və Gənclər Fondunun vasitəsilə  33 milyon manat dəyərində 5 mindən çox layihə maliyyələşdirilib.

Lakin Ə.Həsənov bu vəsaitin hakimiyyətin mövqeyini və siyasətini əks etdirən iqtidaryönlü tədbirlərin və layihələrin maliyyələşdirilməsinə sərf olunduğunu söyləməyi  “unudub”.

Ə.Həsənov razılıqla qeyd edib ki, 2013-cü ildən Azərbaycan hökuməti xaricdəki layihələrin də donoru olub. Ancaq o, harada və nəyin maliyyələşdirildiyini açıqlamayıb.

Öz növbəsində AŞ Baş Direktorluğu demokratik idarəetmə üzrə direktoru Klaudia Luciani deyib ki, iki il üçün nəzərdə tutulan “Vətəndaş cəmiyyəti dialoqu” layihəsində iki  əsas məqsəd var: QHT sahəsində qanunvericiliyin təkmilləşdirilməsi və onun AŞ standartlarına uyğunlaşdırılması; ictimai birliklərlə əlaqələrdə iştirak edən QHT və dövlət orqanlarının potensialının artırılması.

Luciani üzv ölkələrdə QHT-lər üçün şəraitin yaxşılaşdırılması barədə Avropa Şurasının baş katibinin tövsiyələrini xatırladıb və “QHT-lərin siyasi fəaliyyəti” anlamı ilə bağlı AŞ-nin mövqeyini açıqlayıb.

“Bəzi AŞ ölkələrində siyasi fəaliyyətin həyata keçirilməsi bəhanəsilə müstəqil QHT-lərə maneələr yaradılır. Avropa Şurası “QHT-lərin siyasi fəaliyyəti” anlamı altında nəyin nəzərdə tutulduğuna aydınlıq gətirməyə çalışır. Əlbəttə, QHT-lər siyasi partiya deyil, lakin onlar   cəmiyyətdə müxtəlif maraqları əks etdirirlər”, - Luciani bildirib.

AŞ Bakı ofisinin rəhbəri Draqana Filipovic qeyd edib ki, fəal və yaradıcı vətəndaş cəmiyyəti və müstəqil məhkəmələr demokratiyanın ayrılmaz hissəsidir. Layihə Azərbaycanda vətəndaş cəmiyyətinin inkişafı məqsədilə dialoqun irəliləməsinə yönəlib.

“Açıq Cəmiyyət - uzunmüddətli inkişaf və sabitlik üçün vacib şərtdir”, - Avropa İttifaqının Azərbaycandakı missiyasının rəhbəri, səfir Malena Mard bildirib. O qeyd edib ki, vətəndaş cəmiyyəti institutları hökumətin hesabatlılığı və yaxşı idarə edilməsində mühüm rol oynayır.

“Vətəndaş cəmiyyəti insanların səsinin hökumətə çatdırılması baxımından çox vacibdir ki, hökumət hamı üçün yaxşı şərait yaratsın”, - o vurğulayıb.

AŞ layihəsinin rəhbəri Eteri Kamarauli bildirib ki, layihə çərçivəsində QHT sahəsində qanunvericilik təhlil ediləcək və onun AŞ standartlarına uyğunlaşdırılması üçün tövsiyələr təklif olunacaq.

Bundan əlavə, AŞ QHT-lər və dövlət orqanları üçün onların potensialının artırılması üzrə treninqlər keçirəcək.

Qeyd edək ki, indiyədək Azərbaycan hakimiyyəti ancaq hökumətyönlü QHT-lər arasında özünə tərəfdaşlar seçərək vətəndaş cəmiyyəti ilə dialoqu yalnız imitasiya edib.

Son iki ildə vətəndaş cəmiyyəti institutları cinayət təqiblərinə məruz qalıb, bank hesablarına həbs qoyulub, beynəlxalq donorlarla əməkdaşlığa qadağa qoyulub.–06C--