Apellyasiya Məhkəməsi fəal C.Cavadovu həbsdə saxlayıb

Fevralın 7-də Bakı Apellyasiya Məhkəməsində ictimai fəal Cəlal Cavadovun inzibati qaydada həbsindən verilmiş şikayətə baxılıb.

Təhqiqat zamanı Cavadov yanvarın 30-da metronun "28 May" stansiyasının yaxınlığında saxlanıldığını və ən yaxın polis bölməsinə - Bakı şəhər Nəsimi Rayon Polis İdarəsinin 22-ci polis bölməsinə aparıldığını bildirib.

Fəalın sözlərinə görə, polis bölməsində onu işgəncə altında tərkibində narkotik vasitə olan mayeni içməyə məcbur ediblər.

Bir müddət sonra fəal özünü pis hiss edib və ona "təcili yardım" çağırılıb.

Həkimlər gənci Bakı Şəhər Kliniki Tibbi Mərkəzə aparıblar, toksikologiya şöbəsinə yerləşdiriblər.

Ertəsi gün, yanvarın 31-də Bakının Nəsimi Rayon Məhkəməsi Cavadovu 30 gün inzibati həbs cəzasına məhkum edib.

Apellyasiya şikayətinin araşdırılması zamanı məlum olub ki, birinci instansiya məhkəməsinin qərarında onun adından etiraflara istinad edilib. Lakin Cavadov bildirib ki, belə bir ifadə verməyib və ümumiyyətlə Nəsimi Rayon Məhkəməsində proses cəmi 3 dəqiqə davam edib. Cavadov iş materiallarında imzasının saxtalaşdırıldığını, özünün heç bir sənəd imzalamadığını deyib.

Fəal barəsindəki işin saxta və siyasi motivli olduğunu, həbsinə bələdiyyə seçkilərində Meydan TV-nin həbs edilmiş jurnalistlərinə dəstək aksiyası keçirməsinin səbəb olduğunu hesab edir.

Apellyasiya Məhkəməsi fəalı həbsdə saxlayıb.

Məsələ ilə bağlı Daxili İşlər Nazirliyindən şərh almaq mümkün olmayıb.

* Cavadov yanvarın 30-da saxlanılıb. Ertəsi gün Bakının Nəsimi Rayon Məhkəməsi onu İnzibati Xətalar Məcəlləsinin 206-cı (Qanunsuz olaraq narkotik vasitələrin, psixotrop maddələrin istehlakı, satış məqsədi olmadan az miqdarda hazırlanması, əldə edilməsi, saxlanılması, daşınması və ya göndərilməsi) maddəsi ilə təqsirli bilərək, 30 gün müddətinə həbs edib.

Fəallar hesab edirlər ki, Cavadov yanvarın 29-da bələdiyyə seçkilərində etiraz aksiyası keçirməsi ilə əlaqədar saxlanılıb.

Seçki məntəqələrindən birində Cavadov səsvermə qutusuna üzərində Meydan TV-nin həbs edilmiş jurnalistlərinin fotoşəkilləri olan plakat atıb.