Prezident İlham Əliyev: “Azərbaycan quru sərhədləri açmaq niyyətində deyil”
Prezident İlham Əliyev: “Azərbaycan quru sərhədləri açmaq niyyətində deyil”
Azərbaycan prezidenti İlham Əliyev ölkənin quru sərhədlərinin niyə bağlı qaldığını izah edib. Onun sözlərinə görə, bu, milli təhlükəsizlik məsələlərilə bağlıdır.
"Sərhədləri bağlı saxlamaq qərarı COVİD-ə görə verilib. Biz hələ də formal olaraq karantin fazasındayıq. Lakin eyni zamanda, açıq danışaq, sərhədləri bağlı saxlamaq qərarı təkcə ona əsaslanmır", - aprelin 23-də Əliyev "COP29 və Azərbaycan üçün Yaşıl Baxış" mövzusunda beynəlxalq forumda çıxışında deyib.
Prezidentin fikrincə, sərhədlərin bağlı olması azərbaycanlılar, sərhədlərin digər tərəfində yaşayan azərbaycanlılar və digərləri üçün "əlverişsiz" olsa da, "milli təhlükəsizlik bütün digər hisslərdən, bütün başqa səbəblərdən üstün olmalıdır".
"Xüsusilə də indiki zamanda. Şimal sərhədimizdə müharibə var. Cənub sərhədimizdə böhrandır. Təzə münaqişələr də ki yağışdan sonra göbələk kimi peyda olur. Düşünürəm ki, Azərbaycan xalqı bunu anlayır", - Əliyev deyib.
Onun fikrincə, sərhədlərin bağlı olması ölkənin təhlükəsizliyini gücləndirir.
"Milli təhlükəsizlik məsələlərilə hər gün məşğul olan adam kimi deyə bilərəm ki, sərhədləri bağladıqdan sonra bunun milli təhlükəsizliyə saysız-hesabsız xeyrini görmüşük. Və bu, reallıqdır", - o qeyd edib.
Respublikaçı Alternativ Partiyasının icra katibi Natiq Cəfərli Əliyevin çıxışını şərh edərkən deyib ki, prezident, nəhayət, quru sərhədlərinin bağlı qalmasının "pandemiya" ilə əlaqəsinin olmadığını etiraf edib.
Əliyevin fikirlərini şərh edən Cəfərli deyib: “Quru sərhədlər "kanvansaray" deyil, oradan keçərkən ciddi yoxlamalar olur, yük və sənədlər yoxlanılır, hava limanı ilə eyni prosedurdur, ona görə də bu arqument (prezidentin) suallar doğurur. Məmləkətimiz qonşulardan güclüdür, elə deyil? Necə ola bilər ki, onlar açıq sərhədlərlə öz təhlükəsizliyini qoruya bilir, amma biz yox? Bu suallara da cavablar tapılmalıdır”, - Natiq Cəfərli qeyd edib.
Siyasət
-
Mayın 4-də Bakının Əmircan qəsəbəsindək Səttar Bəhlulzadə adına Mədəniyyət Evində Müsavat Partiyasının XI Qurultayı açılıb. Qurultayda 300-dən çox nümayəndə iştirak edib.
-
Bu gün Azərbaycan prezidenti İlham Əliyev Xankəndi Şəhər Prokurorluğunun yaradılması haqqında sərəncam imzalayıb.
-
Konqresmen-demokrat Henri Kuelyar və onun həyat yoldaşı İmeldaya qarşı Azərbaycanın dövlət energetika şirkətindən 600 min dollara yaxın məbləğdə rüşvət almaq ittihamı irəli sürülüb, xəbəri New York Tomes yayıb.
-
İctimai fəal Elgiz Qəhrəman mayın 3-də "Abzas Medianın işi" üzrə şahid qismində dindirilib. Bu barədə jurnalistlərə o özü bildirib.
Rəy yaz