Prezident İlham Əliyev: «Dağlıq Qarabağın statusu ancaq Azərbaycanın tərkibində mümkün ola bilər»

Dağlıq Qarabağın statusu ancaq vahid Azərbaycan dövləti çərçivəsində mümkün ola bilər. Bunu prezident İlham Əliyev bazar ertəsi “N” hərbi hissəsinin açılışında bildirib.

O qeyd edib ki, münaqişənin nizamlanması üçün  Azərbaycanın ərazi bütövlüyü bərpa edilməlidir. Heç vaxt Dağlıq Qarabağa müstəqillik verilməyəcək.

“O ki qaldı Dağlıq Qarabağın gələcək statusuna, bu status ancaq vahid Azərbaycan dövləti çərçivəsində mümkün ola bilər”, - dövlət başçısı vurğulayıb.

“Biz 25 ildir ki, müstəqil dövlətik və heç kimdən heç bir yardım almadan, bəzi başqa ölkələr kimi heç kimin ətəyindən yapışmadan bunu əldə etmişik. Ermənistan asılı ölkədir, öz gələcəyini özü müəyyən edə bilmir”, - İ.Əliyev qeyd edib.

Onun sözlərinə görə, Azərbaycan bundan sonra da öz iqtisadi və hərbi potensialını artıracaq.

Dövlət başçısı əmin olduğunu bildirib ki, Azərbaycan öz ərazi bütövlüyünü bərpa edəcək. Bu əminlik bir çox amilə əsaslanır və bu, ilk növbədə güclü ordunun olmasıdır.

Ötən ilin aprelində Azərbaycan ordusu erməni silahlı təxribatının qarşısını alaraq düşmənə sarsıdıcı zərbələr endirdi. Füzuli, Cəbrayıl, Ağdərə rayonlarının bir hissəsi işğaldan azad edildi.

“Minlərlə hektar torpaq işğaldan azad edildi. On minlərlə hektar torpağa bu gün Azərbaycan ordusu nəzarət edir. O torpaqlarda təmizlik işləri aparılır və yaxın gələcəkdə məcburi köçkünlər o ərazilərə qayıdacaqlar”, - İ.Əliyev vurğulayıb.

Onun fikrincə, aprl döyüşləri “bizim böyük hərbi qələbəmizdir”.

“Uzun illər Ermənistan öz ordusu haqqında miflər yaradırdı, uydurmalar irəli sürürdü ki, guya bunların yenilməz ordusu var. Aprel döyüşləri göstərdi ki, kimin ordusu yenilməzdir. Ermənistan öz acı məğlubiyyətini etiraf etmək istəməsə də məcburdur ki, etiraf etsin. Aprel döyüşlərindən sonra Ermənistanın müdafiə naziri başda olmaqla bir çox yüksək vəzifəli hərbçilər öz vəzifələrindən kənarlaşdırıldı. Bu, aprel döyüşlərinin nəticəsi idi”, - prezident bildirib.—06D--