Prezident İlham Əliyev: �İdman, sadəcə, bir sahə deyil�

Bakı/18.12.17/Turan:"Mən şadam ki, gənc idmançılarımız bizi qələbələrlə sevindirirlər. Yeniyetmə, uşaq idmanı olmadan idman uğurlarından danışmaq mümkün deyil", - prezident İlham Əliyev Milli Olimpiya Komitəsində 2017-ci ilin idman yekunlarına həsr olunan tədbirdə deyib.

İ.Əliyev yay Olimpiya Oyunlarında Azərbaycan idmançılarının qazandıqları medalların sayını artırmasını xüsusi vurğulayıb: "Son Rio Yay Olimpiya Oyunlarında Azərbaycan medalların sayına görə dünya miqyasında 14-cü yerə qalxıb. Bu, tarixi qələbədir. Bu qələbəni bir neçə il bundan əvvəl təsəvvür belə etmək mümkün deyildi".

Prezident bu qələbənin cəmi 25 ilə əldə olunmasını da nəzərə çatdırıb və bunu Azərbaycanda idmanın yüksək səviyyədə olması ilə izah edib: "Ona görə idmanın inkişafı inkişafımızın ümumi kontekstində mühüm yer tutur. Azərbaycan hər bir istiqamət üzrə son illər ərzində uğurlu inkişaf yolu keçib".

Prezidentə görə, güclü iqtisadi imkanlar, beynəlxalq mövqelərin güclənməsi, beynəlxalq aləmdə Azərbaycanın hörmətli ölkə kimi qəbul edilməsi, ümumi uğurlara şərait yaradır.

Prezident qeyd edib ki, ona görə bu gün idmana, sadəcə, bir sahə kimi baxmaq mümkün deyil, idman hər bir ölkənin ictimai həyatında çox böyük rol oynayır.

İ.Əliyev bundan sonra da idmançılara dövlət qayğısının davam edəcəyinin, idmanın inkişafı üçün nə lazım olan hər şeyin ediləcəyini bildirib.-05D-