Prezident İlham Əliyev: �İsti hava Azərbaycanın enerji sisteminin sıradan çıxmasına səbəb ola bilməz�

Bakı/04.07.18/Turan: Prezident İlham Əliyev Mingəçevir İES-də baş vermiş qəza nəticəsində Azərbaycanın böyük bir hissəsinin gün ərzində iki dəfə işıqsız qalmasının isti hava şəraitində enerji istehlakının artması ilə əlaqədar yüklənmə səbəbindən baş verməsilə bağlı energetiklərin fikirlərini şübhə altına alıb.

İsti hava və elektrik enerjisi istehlakının artması Azərbaycanın enerji sisteminin sıradan çıxmasına səbəb ola bilməz, İ.Əliyev iyulun 4-də bildirib.

O, bəzi ölkələri nümunə göstərib ki, orada havanın temperaturu daha yüksəkdir və bu cür qəzalar baş vermir.

"Hətta baş verərsə belə, ölkənin enerji sistemi iflic vəziyyətinə düşmür",- o əlavə edib.

İ.Əliyev ölkədə elektrik enerjisi istehlakının 40% - 70-75 mln. kilovatt/saat artmasına görə qəzanın baş verməsinə bəraət qazandırmağa çalışan "Azərenerji" ASC-nin rəhbəri Etibar Pirverdiyevi kəskin tənqid edib.

İ.Əliyev deyib ki, son 15 ildə ölkənin energetika sahəsinə, o cümlədən elektrik stansiyalarının tikintisinə böyük investisiyalar qoyulub. Odur ki, bir elektrik stansiyasında qəza nəticəsində enerji sisteminin kəsilməsi ciddi suallar doğurur.

"Siz, sadəcə olaraq, utanmalısınız, xalq qarşısında, ölkə qarşısında. Bu isti havada insanlara bu qədər əziyyət vermisiniz. İqtisadiyyata nə qədər böyük ziyan vurmusunuz. Təkcə Neft Şirkətinin ziyanını hesablasaq ölkəyə nə qədər böyük iqtisadi ziyan dəyib", - İ.Əliyev E.Pirverdiyevə müraciətlə deyib.

Prezident qeyd edib ki, yaradılan Dövlət Komissiyası həm birinci, həm də ikinci qəzanın səbəblərini araşdırmalıdır.

İyulun 3-də gecə, sonra isə axşam Mingəçevir İES-də qəza baş verib.

Nəticədə Azərbaycanın 39 şəhər və rayonunun enerji təchizatı kəsilib. İyulun 3-də axşam Bakı metrosunda qatarların hərəkəti dayanıb. -06D--