Prezident İlham Əliyev Vladimir Putini təbrik edib

Bakı/19.03.18/Turan: Prezident İlham Əliyev Vladimir Putini Rusiya Federasiyasının prezidenti postuna yenidən seçilməsi münasibətilə təbrik edib.

"Rusiya Federasiyasının prezidenti seçkilərində inamlı qələbə münasibətilə sizi səmimi qəlbdən təbrik edirəm.

Bu qələbə sizin yüksək siyasi nüfuzunuzun olduğunu və ölkədə sabitliyin, qanunçuluğun və hüquq qaydalarının təmin edilməsinə, irimiqyaslı islahatların həyata keçirilməsinə, xalqın rifahının yüksəlməsinə kömək edən uzunmüddətli sosial proqramların reallaşmasına yönəldilmiş kursunuzun fəal dəstəkləndiyini təsdiq edir", - təbrik məktubunda deyilir.

İ.Əliyev qeyd edib ki, Azərbaycan ilə Rusiyanı çoxəsrlik möhkəm dostluq və mehriban qonşuluq münasibətləri bağlayır.

"Sevindirici haldır ki, bizim dövlətlərarası münasibətlər bu gün bu möhkəm təməl üzərində uğurla inkişaf edir. Bu münasibətlərin, bütövlükdə Azərbaycan ilə Rusiya arasında hərtərəfli əməkdaşlığın və qarşılıqlı fəaliyyətin genişlənməsinə Sizin şəxsi töhfənizi xüsusi qeyd etmək istəyirəm", - İ.Əliyev vurğulayıb.

O əmin olduğunu bildirib ki, Azərbaycanla Rusiya arasındakı strateji tərəfdaşlığın daha da möhkəmlənməsi üzrə birgə səylərimiz xalqlarımızın və ölkələrimizin maraqlarına, regionda sülhün, təhlükəsizliyin və tərəqqinin təmin olunmasına bundan sonra da kömək edəcək.

Martın 18-də Rusiyada keçirilən prezident seçkilərində V.Putin qalib gəlib və o 4-cü dəfə RF prezidenti olacaq.06D-