Prezident İlham Əliyevin ATƏT Minsk Qrupu həmsədrlərilə görüşü

Bakı/12.12.20/Turan: Şənbə günü dövlət başçısı İlham Əliyev ATƏT-in Minsk Qrupunun Fransa və ABŞ-dan olan həmsədrləri Stefan Viskonti və Endrü Şoferi qəbul edib. Görüşdə rusiyalı həmsədr İqor Popovun yerinə Rusiyanın Azərbaycandakı səfiri Mixail Boçarnikov, həmçinin ATƏT-in fəaliyyətdə olan sədrinin şəxsi nümayəndəsi Anjey Kasprşik iştirak edib.

Görüşün təfərrüatları açıqlanmır. Xatırladaq ki, həmsədrlər Bakıdan Yerevan gedəcəklər.

Ekspertlərin fikrincə, danışıqların əsas mövzusu üç həmsədr ölkə liderinin bundan öncə bəyan etdiyi kimi, Dağlıq Qarabağın statusu, həmçinin regionda sülhməramlı əməliyyatlarda Rusiyadan başqa digər ölkələrin hərbçilərinin iştirakıdır.   

Bu gün Azərbaycan prezidentinin xarici siyasət məsələləri üzrə köməkçisi Hikmət Hacıyev Dağlıq Qarabağ münaqişəsi anlayışının artıq mövcud olmaması ilə bağlı prezident İlham Əliyevin bundan öncə səsləndirdiyi bəyanatı təkrarlayıb. Bu, o deməkdir ki, Bakı hərbi əməliyyatların nəticələri ilə hesablaşmağı tələb edir, necə ki bundan öncə erməni tərəfi danışıqlardan imtina edərək bunu tələb edirdi. -02D-