Prokurorluq jurnalistlərin minaya düşməsində erməni diversiyası ehtimalını istisna edir

Bakı/07.06.21/Turan: Azərbaycan Baş Prokurorluğu Kəlbəcərdə jurnalistlərin düşdüyü tank əleyhinə minanın erməni qanunsuz silahlı birləşmələrinin Kəlbəcər rayonunu tərk edən zaman basdırıldığını ehtimal edir.

Baş Prokurorluğun 7 iyun tarixli məlumatında deyilir ki, bir sıra kütləvi informasiya vasitələri və sosial media minanın erməni diversiyaçıları tərəfindən yerləşdirilməsi barədə əsassız iddialar dərc edir.

“Aparılmış ilkin istintaqla müəyyən edilib ki, hadisənin baş verdiyi əraziyə Azərbaycan Respublikası Silahlı Qüvvələrinin nəzarəti tam təmin olunduğundan, işğaldan azad olunduqdan sonra oraya düşmən təxribat qruplarının sızması və orada mina basdırması istisna edilir”, deyə məlumatda qeyd edilir.

Hadisə yerinə mütəxəssislərin iştirakı ilə keçirilmiş baxış zamanı 240x230 sm ölçülərində 97 sm dərinliyində çuxur və yararsız hala düşmüş “Kamaz” markalı sərnişin avtomobili aşkarlanıb. Partlayış yerində minanın heç bir qalığının aşkar olunmaması ilə müəyyən edilir ki, partlayış zamanı istifadə olunan mina plastmas, parça və ya korpussuz tipli tank əleyhinə minaya aid olub, fuqas (zirehdələn) tipli, tank və zirehli texnikaların tırtılına qarşı istifadə olunmaqla yollarda və texnikaların hərəkət edə biləcəyi yerlərdə qurulması üçün nəzərdə tutulub.

Partlamış minanın tank əleyhinə TM-62P2, TM-62P3, TM-62T və ya TM-62B tipli (eyni qrupa daxil olan) mina olması və üzərindən avtobusun keçməsi nəticəsində minanın işə düşməsi (partlaması) ehtimal edilir

Həmçinin müəyyən edilib ki, erməni qanunsuz silahlı birləşmələri Kəlbəcər rayonunu tərk edən zaman geri çəkildikləri əraziləri minalayıblar, deyə məlumatda bildirilir.

Xatırladaq ki, iyunun 4-də Kəlbəcər rayonunun Susuzluq kəndi yaxınlığında (Ermənistanla sərhəddən 4 km məsafədə) “Kamaz” avtomobili minaya düşüb, nəticədə üç nəfər həlak olub, dörd nəfər isə yaralanıb. Həlak olanların ikisi jurnalistdir. -02D-