Prokurorluq SMDT rəhbərinin Azərbaycanı tərk etməsini qadağan edib

Baş Prokurorluğun Ağır Cinayətlərə dair İşlər üzrə İstintaq İdarəsi Seçkilərin Monitorinqi və Demokratiyanın Tədrisi Mərkəzinin (SMDT) fəaliyyətinin araşdırılması ilə əlaqədar bu QHT-nin rəhbəri Anar Məmmədlinin ölkəni tərk etməsini qadağan edib. Bu barədə Turan-a Məmmədli özü bildirib.

İstintaqın bir ay əvvəl başlamasına baxmayaraq, ölkəni tərk etmək qadağası Məmmədlinin Aİ-nin Vilnyusda keçiriləcək “Şərq Tərəfdaşlığı” sammitinə səfəri ərəfəsində tətbiq edilib.

Forum çərçivəsində proqramın iştirakçısı olan ölkələrin vətəndaş cəmiyyəti fəallarının görüşü planlaşdırılırdı.

Vilnyus sammitinə Azərbaycanın Vətəndaş Cəmiyyəti Forumu Milli Platformasının iştirakçısı olan 10-dan çox QHT nümayəndəsi dəvət edilib.

Məmmədlinin səfəri iki ay əvvəldən planlaşdırılırdı və iki həftə əvvəl o, bu barədə prokurorluğa məlumat verib.

Prokurorluqda Məmmədlinin tədbirdə iştirakının məqsədi ilə maraqlanıblar.

“Bu gün mənə zəng etdilər və dedilər ki, ölkəni tərk edə bilmərəm və bu qadağa istintaq başa çatana qədər qüvvədə olacaq”, deyə o, Turan agentliyinə bildirib.

“İstintaqın başlamasından bir ay keçir. Bu müddət ərzində SMDT üzvlərinin ifadə, birləşmək və toplaşmaq azadlıqlarını məhdudlaşdıran istintaq hərəkətləri olub. İndi yerdəyişmə azadlığını da məhdudlaşdırırlar”, deyə Məmmədli qeyd edib.

Xatırladaq ki, bir ay əvvəl prokurorluq SMDT-ni vergi ödənişindən yayınmaqda, vəzifə səlahiyyətlərindən sui-istifadə və qanunsuz sahibkarlıqda ittiham edərək, bu QHT-nin fəaliyyətinin araşdırılması üçün bütün sənədlərini və iki kompüterini müsaditə edib. -06D-