Prokurorluq və FHN Gəncəyə raket zərbəsi haqda

Bakı/17.10.20/Turan:  Gəncə şəhərinə gecə raket zərbəsi qurbanlarının sayı 65-ə çatıb, o cümlədən 13 nəfər həlak olub, 52 nəfər bədən xəsarəti alıb.

Ölənlər arasında iki azyaşlı uşaq var.

Gəncəyə raket zərbəsi faktı ilə bağlı Azərbaycan Respublikası baş prokuroru tərəfindən Azərbaycan Respublikası Cinayət Məcəlləsinin 100.2 (təcavüzkar müharibənin aparılması), 120.2.1 (cinayətkar təşkilat tərəfindən törədilmiş qəsdən adam öldürmə), 120.2.4 (xüsusi amansızlıqla və ya ümumi təhlükəli üsulla törədilmiş qəsdən adam öldürmə), 120.2.7 (iki və ya daha çox şəxsin qəsdən öldürülməsi), 120.2.12 (milli, irqi, dini nifrət və ya düşmənçilik motivləri əsasında qəsdən adam öldürmə), 186.3 (xüsusilə külli miqdarda əmlakın qəsdən məhv edilməsi və ya zədələnməsi) və digər maddələr ilə cinayət işi açılıb. İş üzrə istintaqın aparılması Baş Prokurorluğun İstintaq İdarəsinə tapşırılıb, bu barədə Baş Prokurorluğun mətbuat xidməti məlumat verib.

Azərbaycan XİN öz bəyanatında  Ermənistanı Gəncə şəhərini qəsdən atəşə tutmaqda ittiham edib.

“Beynəlxalq hüququn norma və prinsipləri, o cümlədən beynəlxalq humanitar hüquq, eləcə də elan olunmuş humanitar atəşkəsi kobud şəkildə pozaraq dinc insanların məqsədli şəkildə öldürülməsi müharibə cinayəti və insanlıq əleyhinə cinayətdir. Ermənistan rəhbərliyi bu cinayətə görə tam məsuliyyət daşıyır”, - sənəddə deyilir.

Beynəlxalq ictimaiyyət Ermənistanın Azərbaycan xalqına qarşı  bu qeyri-insani aktlarına göz yummamalıdır, sənəddə qeyd olunur.—06В-