Putin Ukraynada uğursuzluğa düçar olur - Dövlət Departamenti

Vaşinqton/04.01.23/Turan: Kremlin Ukraynalıların ürəyinə qorxu və ümidsizlik salmaq cəhdləri "uğursuzluğa düçar olur", bu barədə çərşənbə axşamı Dövlət Departamentinin nümayəndəsi Ned Prays bildirib.

Turan-ın son günlər Rusiyanın İran istehsalı olan PUA-larla hücumları fəallaşdırmasının səbəbi haqqında sualına cavabda Prays belə deyib: "Hamıya aydındır ki, Putinin hərbi məqsədləri uğursuzluğa düçar olub".

"Ruslar daha çox kritik əhəmiyyətə malik infrastruktu, enerji obyektlərini, mülki hədəfləri bombalayır, bizim üçün bu, vəhşilik və uğursuz strategiyanın göstəricisidir".

Praysın sözlərinə görə, Rusiyanın Ukraynaya genişmiqyaslı hücumundan sonra Ukraynanın minlərlə dinc sakini öldürülüb, şikəst edilib və yaralanıb və onların əksəriyyəti hərbi cinayətlərin və digər vəhşiliklərin qurbanı olub. Hazırda Ukraynada 5,9 milyondan çox daxili köçkün və 7.8 milyondan çox ölkəni tərk etmiş qaçqın var.

"Bundan başqa, Kreml əsas ərzaq məhsullarının inkişaf etməkdə olan ölkələrə tədarükünə mane olmaqla və enerji bazarlarında qiymət artımını sürətləndirərək, inflyasiyanı gücləndirməklə, bütün dünyada insanların həyatını çətinləşdirib", deyə Prays bildirib.

Eyni zamanda, Kremlin Transatlantik birliyi parçalamaq planları "əks təsirə malik olub".

"Biz Finlandiya və İsveçin həmişəkindən daha da güclü olan və Ukraynanı tamamilə dəstəkləyən genişlənmiş NATO-ya qoşulmasını səbrsizliklə gözləyirik", deyə o bildirib.

Dekabrın 29-da Bayden Ukraynaya və digər tərəfdaşlara dəstək üçün, habelə müharibənin nəticələrinin aradan qaldırılması üçün 44,9 milyard dollar ayrılmasını nəzərdə tutan Ukrayna üçün əlavə yardım haqqında Qanun imzalayıb. 0