Putinin Qarabağa dair müsahibəsi 4 tərəfə ünvanlanıb

Bakı/18.11.20/Turan: Noyabrın 17-də RF prezidenti Vladimir Putin Rusiya televiziyasına böyük müsahibəsində Qarabağ ətrafındakı vəziyyətə ətraflı toxunub, öz ölkəsinin yerini, rolunu və məqsədini, həmçinin prosesin digər iştirakçılarını müəyyənləşdirib.

Onun bəyanatlarının xeyli hissəsi erməni tərəfinə ünvanlanıb. Putinin baş nazir Paşinyanın rolu ilə bağlı qiymətləndirmələri bir qədər gözlənilməz olub. Putin faktiki olaraq Paşinyanı müdafiə edib və bildirib ki, baş nazirin ünvanına səslənə Ermənistanın maraqlarını satması barədə ittihamlar əsassızdır.

Həmçinin Putin Qarabağ münaqişəsinin səbəblərinin ermənilər üçün sərfəli olan versiyaya əsaslanaraq, ermənilərin Qarabağı Ermənistana vermək tələblərindən deyil, Sumqayıt hadisələrindən saymağa başlayıb.

O həmçinin türk hərbçilərinin sülhməramlı əməliyyatda iştirakına razılıq vermədiyini etiraf edib və bunu türklərin "soyqırım"ı xatırlatdıqları ermənilərin "tarixi yaddaşı" ilə izah edib. 

Putin İlham Əliyevin “Qarabağ heç bir status almayacaq, çünki Azərbaycan vahid dövlətdir” bəyanatını təkzib etməyə çalışıb. Putin qaranlıq şəkildə işarə edib ki, Qarabağın statusu gələcəkdə həll olunacaq.

Bütün bu jestləri Ermənistanda sabitliyin pozulmasına yol verməmək cəhdi kimi qiymətləndirmək olar. Belə ki, bu, nəinki bütün razılaşmaların həyata keçirilməsini poza bilər, həm də Rusyanın özünün rolunu zəiflədə bilər.  Belə ssenari mütləq Qərbin Ermənistanın işlərinə qarışmasına, Ermənistanın özündə isə anti-Rusiya əhval-ruhiyyəsinin güclənməsinə gətirib çıxaracaq.

Bunun apogeyi Rusiya hərbi bazasının Ermənistandan, Ermənistanın özünün isə KTMT-dən və Avrozesdən çıxmasını tələb edən millətçi qüvvələrin hakimiyyətə gəlməsi ola bilər.

Qarabağın statusunun gələcəkdə ATƏT-in iştirakı ilə danışıqlar yolu ilə həll olunması tezisi ilk növbədə, Moskvanın birtərəfli addımlarından narazı olan ABŞ və Fransaya ünvanlanıb. Amma regionda həm Rusiyanın, həm də Türkiyənin güclənməsindən eyni dərəcədə narazı olan Vaşinqton və Parisi bu mesaj çətin ki qane etsin.

Bu planda Moskva və Ankara yenidən "situasiya müttəfiqlərinə" çevriliblər ki, Moskvada durumu belə ifadə etməyi xoşlayırlar.

Türkiyənin münaqişədəki roluna müsbət qiymət verilməsi Ankaranın ünvanına reveransdır və Türkiyənin regiondakı proseslərdə iştirak etmək hüququnun tanınmasıdır.

Azərbaycanın Türkiyənin timsalında özünə müttəfiq seçmək hüququnun tanınması, Qarabağ və onun ətrafındakı rayonların Azərbaycanın qanuni ərazisi olmasının təsdiqlənməsi Bakıya ünvanlanıb.

Eyni zamanda Putin Rusiya sülhməramlılarının toxunulmazlığına işarə edib. Belə ki,  Cənubi Osetiya, Abxaziya və Qarabağ arasında paralellər aparan Putin deyib ki, Rusiya Qarabağı tanımayıb. O, bunun səbəbini açıqlayaraq qeyd edib ki, Gürcüstan rəhbərliyi Rusiya sülhməramlılarına hücum edib və bu, vəziyyəti dəyişib. Bu müqayisə Azərbaycana ünvanlanmışdı.

Müsahibəni bütövlükdə qiymətləndirsək, demək olar ki, Putin ona əsaslanır ki, Rusiya Qafqazda öz mövqeyini möhkəmləndirib və bu nüfuzu həmçinin möhkəmlənən Türkiyə ilə bölüşmək məcburiyyətində qalmasında problem görmür.

Lakin Rusiya Qafqazda Qərb ölkələrinin yox, regional ölkənin – Türkiyənin möhkəmlənməsinə üstünlük verir.-02D-