Qadınlar Nigar Yaqublunun müdafiəsi üçün birləşdilər

AXCP gənclər təşkilatının qadın fəalları cümə axşamı YNH törətmək ittihamı ilə həbs edilmiş müsavatçı Nigar Yaqublunun müdafiəsinə həsr olunmuş iclas keçiriblər.

Təşkilatın üzvü Bəyim Həsənli qeyd edib ki, Nigarın həmyaşıdları və silahdaşları həmrəylik nümayiş etdirmək və onun müdafiəsinə qalxmaq istəyirlər. “Hamıya aydındır ki, Nigar Yaqublunun həbsi siyasi əsaslıdır. Hakimiyyət qadın fəalları qorxutmaq üçün bunu qəsdən edib. İndiyədək bir çox məmurların və yüksək vəzifəli şəxslərin övladları YNH törədiblər, lakin nədənsə onlardan heç biri həbs edilməyib”, deyə o qeyd edib.

Nigarın vəkili Nemət Kərimli bildirib ki, sabah 11.00-a Abşeron Məhkəməsində Nigar Yaqublunun işi üzrə məhkəmə prosesi təyin edilib. O xatırladıb ki, qətimkan tədbirinin dəyişdirilməsi və ev dustaqlığı ilə əvəz edilməsi haqqında vəsatətlə Abşeron məhkəməsinə müraciət edib. Lakin məhkəmə müdafiə tərəfin arqumentinin kifayət qədər olmamasını əsas gətirərək, vəsatəti təmin etməyib. Sumqayıt Apellyasiya Məhkəməsi birinci instansiya məhkəməsinin qərarını qüvvədə saxlayıb.

Abşeron məhkəməsində Nigar Yaqublunun işi üzrə hazırlıq iclasında qeyd edilib ki, cari ilin 6 ayı ərzində 730 YNH törədilib, cəmi 41 nəfər həbs edilib. Həm də bu, hadisə yerindən qaçan, sərxoş vəziyyətdə qəza törədən şəxslər, avtoxuliqanlar olub. Nigar belə bir əməl törətməyib, buna görə onun həbsi tamamilə qanunsuzdur, deyə vəkil qeyd edib.

AXCP gənclər təşkilatının sədri Əbülfəz Qurbanlı Nigarın bütün yaşıdlarının onun müdafiəsi üçün birləşməyə çağırıb. O, həmçinin qadın fəalları Nigarı dəstəkləmək üçün məhkəmə prosesində iştirak etməyə dəvət edib.

Qadın Krizis Mərkəzinin rəhbəri Mətanət Əzizova Nigarın müdafiəsi məqsədilə beynəlxalq qurumlara müraciətləri fəallaşdırmağı zəruri hesab edir.

“Ölkə xaricində Nigar haqqında məlumat çox azdır. Müxtəlif imzatoplama aksiyaları keçirmək və müraciətlər vermək lazımdır”, deyə Əzizova bildirib.

AXCP sədr müavini Gözəl Bayramlı xatırladıb ki, Müsavat Partiyasının sədr müavini Tofiq Yaqublunun ailəsi siyasi mübarizədə çox fəaldır.

“Nigar və bacısı Nərgiz bütün aksiyalarda, xüsusən Eurovision müsabiqəsindən əvvəl keçirilən aksiyalarda fəal iştirak ediblər. Bu səbəbdən repressiyalar bu ailəyə qarşı yönəlib. Sosial şəbəkələrdə Nigarın müdafiəsini gücləndirmək lazımdır”, deyə Bayramlı bildirib.

“Biz üç dəfə həbsxanada – Kürdəxanı təcridxanasında bacımla görüşdük. O, möhkəm dayanır. Hakimiyyət fəallığımıza görə bizdən qisas alır. Dövlət başçısı sadə gənc qızdan qisas alır”, deyə Nigarın bacısı Nərgiz Yaqublu bildirib.

İclasda Nigarın müdafiəsi üçün qadınların iştirakı ilə yürüş keçirmək təklifi səslənib. 

24 yaşlı Nigar Yaqublu bu ilin avqust ayında YNH törətmək ittihamı ilə həbs edilib. -04С-