�Qadınlar, sülh və təhlükəsizlik� mövzusunda konfrans keçirilir

Bakı/20.09.18/Turan: Sentyabrın 20-də Bakıda "Qadınlar, sülh və təhlükəsizlik" mövzusunda konfrans başlayıb.

Konfransda NATO baş katibinin müavini, Azərbaycanın Ailə, Qadın və Uşaq Problemləri üzrə Dövlət Komitəsinin sədri, Azərbaycanın NATO yanında nümayəndıliyinin rəhbəri, Milli Məclisin deputatları, güc qurumlarının təmsilçiləri, Azərbaycan və Gürcüstanın vətəndaş cəmiyyətinin təmsilçiləri iştirak edirlər.

Azərbaycanın NATO yanında nümayəndəliyinin başçısı vəzifəsini icra edən Qaya Məmmədov deyib ki, Azərbaycan NATO-nun dəyərli tərəfdaşıdır və ölkənin NATO ilə təhlükəsizlik problemləri üzrə sıx əməkdaşlıq tarixi var.

"NATO Azərbaycanın Əfqanıstandakı missiyaya daimi töhfəsini, eləcə də Əfqanıstan milli təhlükəsizlik qüvvələrinin hazırlanması işinə dəstəyini yüksək qiymətləndirir",- o qeyd edib.

Ailə, Qadın və Uşaq Problemləri üzrə Dövlət Komitəsinin sədri Hicran Hüseynova çıxışında qadın hüquqlarının hökumət tərəfindən qorunması, gender bərabərliyi barədə məlumat verib. O, Azərbaycanda qadınların 1918-ci ildən seçki hüququnun olduğunu diqqətə çatdırıb.

H.Hüseynova Ermənistan-Azərbaycan münaqişəsinin cəmiyyətə vurduğu ziyandan danışarkən deyib ki, münaqişə nəticəsində bir milyondan çox azərbaycanlı qaçqın və məcburi köçkün vəziyyətinə düşüb.

"Onlardan 400 mindən çoxunu qadın, 300 mindən çoxunu uşaqlar təşkil edir. Azərbaycan münaqişə müddətində 1114 nəfərin əsir və girovluqdan azad edilməsinə nail olub. Əsirlikdən xilas olanlardan 223-ü uşaq, 363-ü qadın, 224-ü yaşlı insandır. Onların yenidən cəmiyyətə inteqrasiyası üçün reabilitasiya işlərinin aparılması çox vacibdir. Eyni zamanda, 29 uşaq, 98 qadın və 112 qoca hazırda girovluqdadır. Onların taleyi hələ də məlum deyil və bu gün də bu bizi çox narahat edir", - o qeyd edib

NATO baş katibinin müavini Rouz Getemoller Azərbaycan-NATO münasibətlərinin yüksək səviyyədə olduğunu bildirib.

"NATO terrorizmlə mübarizədə Azərbaycanın rolunu yüksək dəyərləndirir. Azərbaycanın Əfqanıstandakı mövcudluğunu artıraraq oradakı sülhməramlı missiyanı dəstəklədiyinə görə çox şadıq. Azərbaycan həmçinin Əfqanıstana malların təchizatının diversifikasiyası məsələsində çox əhəmiyyətli nəqliyyat rolu oynayır. Beləliklə, Azərbaycan fəal şəkildə terrorizmə qarşı mübarizədə NATO-nun səylərini dəstəkləyir", - o qeyd edib

R.Getemoller eyni zamanda regionun ən mühüm dövləti kimi Azərbaycanla əməkdaşlığın əhəmiyyətini qeyd edib.

"Bir çox layihələr üzərində işləyirik və bu layihələr Azərbaycanın maraqlarına xidmət edir".

Xanım Getemoller Ermənistan-Azərbaycan münaqişəsinsdən danışarkən bildirib ki, NATO ölkələrin ərazi bütövlüyü məsələsi üzrə BMT nizamnaməsi və ATƏT-in Helsinki yekun aktını vacib hesab edir.

"Biz həmçinin bütün münaqişələrin sülh yolu ilə həllinin tərəfdarıyıq. Biz Minsk Qrupu həmsədrlərinin Azərbaycan və Ermənistanın Dağlıq Qarabağ münaqişəsinin həlli istiqamətində sülh yollarının axtarışı üzrə səylərini dəstəkləyirik", - o deyib.

Bu gün Bakıda ADA Universitetində NATO-nun "Civilian Oversight of The Armed Forced" müdafiə sahəsində təhsilin təkmilləşdirilməsi üzrə proqramınının əfqanıstanlı məzunlarına sertifikatlar təqdim edilib. Proqramda 14 Əfqanıstan vətəndaşı iştirak edib.

"Mən həm də bu cür proqramların həyata keçirilməsi üçün platforma yaratdığına görə Azərbaycana minnətdarlığımı bildirirəm", - o qeyd edib.

"DEEP Afganistan" proqramının başlanmasından bəri Azərbaycan orada fəal rol oynayır və NATO-nun bu ölkədəki fəaliyyətinə böyük töhfə verir", - NATO baş katibinin müavini bildirib. -03B-