Qanunsuz erməni silahlı dəstə üzvlərinin apardığı mühəndis işlərinin qarşısı alınıb

Bakı/15.02.22/Turan:   Fevralın 15-i günorta saatlarında Rusiya sülhməramlılarının müvəqqəti yerləşdiyi Azərbaycan ərazisindəki qanunsuz erməni silahlı dəstəsinin üzvləri tərəfindən kənd təsərrüfatı işləri adı altında səngərin mühəndis cəhətdən hazırlanması məqsədilə qazıntıların aparılması tərəfimizdən müşahidə edilib. Xəbəri Müdafiə nazirliyi yayıb.

Bölmələrimiz tərəfindən görülən təxirəsalınmaz tədbirlər nəticəsində aparılan işlərin qarşısı dərhal alınıb.

«Erməni mətbuatında yayılan guya Azərbaycan Ordusunun bölmələrinin Rusiya sülhməramlılarının müvəqqəti yerləşdiyi Azərbaycan ərazisində atəş açması nəticəsində qanunsuz erməni silahlı dəstə üzvünün ağır yaralanması barədə məlumat yalandır.

Erməni tərəfi qanunsuz birləşmənin üzvləri arasında baş verən cinayətləri ört basdır etmək üçün növbəti təxribata əl atıb»,  - məlimatda daha sonra deyilir.

Erməni KİV-lərinin iddiasına görə isə, bu gün saat 16.15 radələrində Qarabağda Rusiya sülhməramlı kontingentinin məsuliyyət zonasında atışma zamanı “Ermənistan Silahlı Qüvvələrinin hərbçisi» Xaçatur Xaçatryan güllə yarası alıb.

Ermənistan mətbuatının məlumatına görə, hadisə Ağdam rayonu ərazisinə  yaxınlıqda yerləşən Xramort kəndi ətrafında baş verib.—06D-