Qarabağ separatçılarının işi üzrə məhkəmə prosesində

Yanvarın 21-də Bakıda Qarabağ separatçılarının cinayət işi üzrə hazırlıq iclası davam edib. Yenə də məhkəməyə yalnız iki hökumət media orqanının - AZTV və Azərtac-ın nümayəndələri buraxılıb.

İclasda müdafiə tərəfinin vəsatətlərinə baxılıb.

David Babayanın vəkili vəsatətlə çıxış edib. O, müdafiəçisi olduğu şəxslə konfidensial görüş verilməsini xahiş edib. İttiham tərəfi vəsatətə etiraz etməyib. Hakim vəsatəti təmin edib və konfidensial görüş üçün məhkəmədə fasilə elan olunub.

Fasilədən sonra təqsirləndirilən şəxslərin əksəriyyətinin vəkilləri müdafiə etdikləri şəxslərin barəsində həbs qətimkan tədbirlərinin ev dustaqlığı ilə əvəz olunmasını xahiş ediblər. Lakin dövlət ittihamçısı müttəhimlərin şəxsiyyətini və ittihamların ağırlığını nəzərə alaraq, bunun əleyhinə çıxış edib.

Hakim Zeynal Ağayev təqsirləndirilən şəxslərin hər birinə vəsatətlərə münasibət bildirmək üçün söz verib. Müttəhim Araik Arutyunyan digər müttəhimlərdən fərqli olaraq ev dustaqlığına buraxılması barədə vəkili və ya özü tərəfindən vəsatət verilmədiyini, eləcə də səhhəti ilə bağlı şikayətinin olmadığını deyib: “Sağlamlıqla bağlı problem olduqda təcridxanada həll olunur. Ümumiyyətlə, digər təqsirləndirilən şəxslərdən sağlamlıqları ilə bağlı şikayət eşitməmişəm”.

Müttəhimlər Arkadi Qukasyan, Bako Saakyan, Melikset Paşayan, Davit Allahverdiyan vəsatətlərin təmin olunaraq ev dustaqlığına buraxılmalarını xahiş ediblər.

Digər müttəhimlər vəsatətin təmin olunub-olunmamasını məhkəmənin mülahizəsinə buraxıblar.

Növbəti məhkəmə iclası yanvarın 27-də olacaq və vəsatətlərlə bağlı qərarlar elan olunacaq.