Qarabağ separatçılarının işi üzrə məhkəmədə terrorçuluq faktları ilə bağlı epizodlar açıqlanıb

Fevralın 11-də Bakı Məhkəmə Kompleksində Qarabağ separatçılarının işi üzrə proses davam etdirilib.

Prokurorlar ittiham aktının Azərbaycanın işğal edilmiş ərazilərində azərbaycanlı əhalinin kütləvi qətlləri, Ermənistan və erməni separatçıları tərəfindən törədilən terrorçuluq faktlarına aid hissəsini oxuyublar.

Müttəhimlərlə yanaşı, qeyd edilən cinahətlərdə Ermənistan prezidenti olmuş Robert Koçaryan, Serj Sarkisyan, müdafiə nazirləri Vazqen Manukyan, Seyran Ohanyan, həmçinin Samvel Babayan, Vitali Balasanyan və digərləri də iştirak ediblər.

Baş Prokurorun xüsusi tapşırıqlar üzrə köməkçisi Tuqay Rəhimli ittihamın təcavüzkar müharibənin gedişində Qazax rayonunun Bağanıs-Ayrım, Şuşa rayonunun Malıbəyli-Quşçular, Xocavənd rayonunun Qaradağlı, Ağdərə rayonunun Baş Güney (Baş Güneypəyə), Goranboy rayonunun Ballıqaya və Gülüstan, Kəlbəcər rayonunun Ağdaban, Comərd və Başlıbel kəndlərində azərbaycanlıların didərgin salınmasını və məhv edilməsi faktlarına dair hissəsini elan edib.

Genişmiqyaslı və sistemli hücumlar zamanı əhalini kütləvi şəkildə məhv etmək məqsədilə ümumilikdə 241 nəfər güllələnməklə, diri-diri yandırılmaqla, ağır dərəcəli bədən xəsarətləri yetirilməklə qəsdən öldürülüb, 149 nəfərin müxtəlif dərəcəli bədən xəsarətləri yetirilərək qəsdən öldürülmələrinə cəhd edilib.

Daha sonra ittiham aktının təcavüzkar müharibənin gedişində törədilmiş terrorçuluq cinayəti faktlarına dair hissəsinin elanına başlanıb.

Baş prokurorun böyük köməkçisi Vüsal Əliyev qeyd edib ki, 1988-2023-cü illər ərzində 308 epizod üzrə törədilmiş terrorçuluq cinayətləri nəticəsində ən azı 210 hərbi qulluqçu və 239 mülki şəxs olmaqla, 449 nəfər şəxs qəsdən öldürülüb, 1013 hərbi qulluqçu və 716 mülki şəxs olmaqla, 1729 nəfərin qəsdən öldürülməsinə cəhd göstərilib. Ümumilikdə terrorçuluq cinayətləri nəticəsində 17 uşaq qəsdən öldürülüb, 53 uşağın müxtəlif dərəcəli bədən xəsarətləri yetirilməklə qəsdən öldürülməsinə cəhd olunub.

Daha sonra dövlət ittihamçıları terrorçuluq cinayətləri ilə bağlı konkret epizodları elan ediblər. Belə ki, 1991-ci il yanvarın 9-da Şuşa rayonu istiqamətində hərəkətdə olan “UAZ-469” markalı avtomobili atəşə tutulub, nəticcədə sovet ordusunun üç hərbi qulluqçusu və jurnalist Salatın Əsgərova öldürülüb.

1991-ci il noyabrın 20-də Xocavənd rayonunda içərisində Azərbaycan dövlət xadimlərinin, Rusiya və Qazaxıstandan yüksək vəzifəli hərbi müşahidəçilərin olduğu helikopter vurulub. Nəticədə 22 nəfər həlak olub.

2020-ci il oktyabrın 4-dən 17-dək olan müddət ərzində Gəncə şəhərinə raket zərbələri nəticəsində ümumilikdə 26 mülki şəxsi qəsdən öldürülüb, 175 mülki şəxsə qəsdən müxtəlif dərəcəli bədən xəsarətləri yetirilib.

2020-ci il oktyabrın 5-dən noyabrın 7-dək olan müddət ərzində raket zərbələri nəticəsində Bərdə rayonunda ümumilikdə 29 mülki şəxs qəsdən öldürülüb, 103 mülki şəxsə qəsdən müxtəlif dərəcəli bədən xəsarətləri yetirilib.

Ümumilikdə 44 günlük Vətən müharibəsi zamanı Gəncə və Mingəçevir şəhərləri, Tərtər, Ağdam, Bərdə, Ağcabədi, Füzuli, Goranboy (Naftalan), Beyləqan, Cəbrayıl, Kürdəmir və Qəbələ rayonları üzrə ümumilikdə dövlət və xüsusi mülkiyyətdə olan daşınan və daşınmaz əmlaklara 187 milyon manatdan artıq məbləğdə maddi ziyan vurulub.

Bakı-Tbilisi-Ceyhan neft kəmərinin və Qərb İxrac Boru Kəmərinin Goranboy və Yevlax rayonları ərazisindən keçən hissəsinin partladılmasına cəhd göstərilib.

Prokurorların çıxışlarından sonra məhkəmə növbəti iclasın fevralın 14-də keçiriləcəyini elan edib.

Xatırladaq ki, işin fiqurantları Qarabağ separatçılarının keçmiş liderləri: Arayik Harutyunyan, Arkadi Qukasyan, Bako Sahakyan, Davit İşxanyan, Davit Babayan, Lyova Mnatsakanyandır.

Müttəhimlər kürsüsündə həmçinin Manukyan David, Mnatsakanyan Levon, Beglaryan Vasili, Qazaryan Erik, Allahverdiyan Davit, Stepanyan Qurgen, Balayan Levon, Babayan Madat, Martirosyan Qarik də var.

Onlar hamısı Azərbaycana qarşı ağır cinayətlər (separatçılıq, soyqırım, müharibə aparılması, deportasiya, qətllər, işgəncələr və s.) törətməkdə ittiham olunurlar.

Cinayətlər 1987-2023-cü illər ərzində törədilib. 1389 cinayət işi bir icraatda birləşdirilib. Onların hamısını ömürlük həbs cəzası gözləyir.

Qeyd edilən şəxslər 2023-cü ilin sentyabrında antiterror əməliyyatı zamanı Qarabağda saxlanılıb. Separatçı rejimin keçmiş "dövlət naziri", milyarder Ruben Vardanyanın işi üzrə ayrıca təhqiqat aparılır. Onun işi üzrə növbəti iclas fevralın 10-da keçiriləcək.