Qarabağda Azərbaycanın dövlət idarələrinin sülhməramlı qüvvələrin komandanlığı ilə danışıqlarının ikinci mərhələsi keçirilir

Bakı/07.12.22/Turan: Dekabrın 7-də Qarabağda təbii ehtiyatların qanunsuz istismarı faktlarının araşdırılması üzrə Monitorinq Qrupu Rusiya sülhməramlı qüvvələrinin komandanlığı ilə danışıqları davam etdirib.

Danışıqların davam etdirilməsi barədə razılaşma dekabrın 3-də sülhməramlı qüvvələrin komandanı general Volkovla görüşdə əldə olunub.

Bu gün səhər Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və "AzerGold" Qapalı Səhmdar Cəmiyyətinin əməkdaşları Volkovla görüşmək üçün yenidən sülhməramlıların Xocalıdakı qərargahına gediblər.

Qeyd edək ki, dekabrın 3-də baş tutmuş birinci görüşün yekunlarına görə regionun təbii ehtiyatlarından qanunsuz istifadə faktlarının monitorinqi üzrə Yol Xəritəsinin hazırlanması barədə razılıq əldə olunub.

Söhbət Ermənistan şirkətlərinin təbii ehtiyatları emal etməsindən və hazır məhsulu Qarabağdan Ermənistana aparmasından gedir. Bütün bu işlər Azərbaycanın müvafiq dövlət qurumları ilə razılaşdırılmadan həyata keçirilir. Qeyd edək ki, Azərbaycanda bütün bu cür işlər ciddi şəkildə lisenziyalaşdırılır. 02B