Qarabağda Monitorinq Mərkəzi fəaliyyətə başlayır

Bakı/30.01.21/Turan: Rusiya hərbi qulluqçuları Dağlıq Qarabağ münaqişəsi zonasında atəşkəsə və bütün hərbi əməliyyatların dayandırılmasına nəzarət üzrə Rusiya-Türkiyə Birgə Mərkəzinin fəaliyyət göstərəcəyi Azərbaycanın Ağdam rayonunun Qiyaməddinli kəndi ərazisində öz texnikası ilə hərəkətə başlayıblar. Bu barədə Rusiya Müdafiə Nazirlinin 30 yanvar tarixli məlumatında deyilir.

Buna qədər bir neçə gün boyunca hərbi qulluqçular Xankəndində Rusiya sülhməramlı kontingentinin yerləşmə məntəqəsində Birgə Mərkəzin strukturunu, təyinatını, vəzifə və funksiyalarını, işinin təşkili qaydalarını, habelə ərazisində tapşırıqları yerinə yetirəcəkləri ölkənin mədəniyyətini, ənənələrini və xüsusiyyətlərini öyrəniblər.

Rusiya və Türkiyə tərəfdən paritet əsaslarla təmsil olunmuş Birgə Mərkəzin şəxsi heyəti pilotsuz uçan aparatlardan istifadə ilə vəziyyətin monitorinqi və atəşkəs və bütün hərbi əməliyyatların dayandırılmasına riayət olunmasına nəzarət vəzifələrini həyata keçirəcəklər.

Qeyd edək ki, Mərkəzin Türkiyə kontingenti artıq yerindədir.

Dağlıq Qarabağ münaqişəsi zonasında atəşkəsə və bütün hərbi əməliyyatların dayandırılmasına nəzarət üzrə Rusiya-Türkiyə Birgə Mərkəzi Rusiya Federasiyası və Türkiyə Respublikasının müdafiə nazirlərinin 2020-ci il noyabrın 11-də imzaladıqları Memoranduma uyğun olaraq Azərbaycan ərazisində açılır. Birgə Mərkəz  paritet əsaslarla formalaşır. Hər bir milli strukturda bir rəis, hər tərəfdən eyni sayda nümayəndə (hər birindən 60 nəfər) təmsil edilib. -02B-