Media-icmal 30.01.21

"Yenisabah.az" saytı "Dövlət qurumunun Bakıda parkinq savaşı: Deputat maşını saxlamaq üçün 22 dəqiqə yer axtardı" sərlövhəli məqalədə avtomobillərin park edilməsi ilə bağlı problemin səbəblərini araşdırır. 

Müəllif iddia edir ki, Bakı Nəqliyyat Agentliyi (BNA) ilə bağlı narazılıqlar hər gün artır, amma mövcud problemlər hələ də həllini tapmır.

Müəllifə görə, vəziyyət o yerə gəlib ki, ölkənin tanınmış şəxsləri də tənqidlər səsləndirir və xüsusilə park problemi artıq dözülməz həddədir.

Deputat Rüfət Quliyev bildirib ki, problemin həlli ilə bağlı vaxtilə agentliyə təkliflər verib, amma bu təkliflərin heç biri nəzərə alınmayıb, qurum yenə də öz bildiyini edir.

Deputat əlavə edir ki, rahat parklanma üçün şərait yaradılmalıdır, yoxsa, avtomobillərin fotolarını çəkməklə məsələ həllini tapmır: "Tutaq ki, sosial şəbəkədə yazılanlara inanmadım, axı özüm maşını saxlamaq üçün 22 dəqiqə şəhərdə yer axtarmışam. Hər gün bu problemlərlə rastlaşırıq".   

R.Quliyevin sözlərinə görə, bu məsələ ilə bağlı qanunvericilikdə dəyişiklik edilməsi ehtimalı var, gün ərzində cəmi bir dəfə cərimə olunması nəzərdə tutulur və məsələnin Milli Məclisdə müzakirəsini gözləyirik.

Deputat hesab edir ki, "BakuBus"un BNA-dan alınaraq İnvestisiya Holdinqinə verilməsii müsbət haldır, insanları daşımaqla məşğul olarlar: "Yoxsa, BNA Nazirlər Kabinetinə müraciət edib yol nişanlarının qoyulması səlahiyyətinin bu quruma verilməsini tələb edirdi".

Deputat vurğulayır ki, əvvəl parkomatlar var idi, sonra BNA ilə Bakı Şəhər İcra Hakimiyyəti arasında söz düz gəlmədi, nəticədə aparatlar yığışdırıldı.

"Bizimyol.info.az" isə "Xidmət rəisi: "Badamdarda sürüşmə ərazisində proses hələ stabilləşməyib" sərlövhəli məqalədə yanvarın 28-i axşam Badamdar 20-ci sahə yolunun 7-ci kilometrində baş vermiş sürüşmə hadisəsini dəyərləndirir.

Müəllif vurğulayır ki, hadisədən bir ay əvvəl sürüşmənin qaş hissəsində kiçik çatlar müşahidə edilib, bu müddət ərzində baş vermiş atmosfer çöküntülərinin həcminin artması həmin çatlar vasitəsilə filtrasiyaya yığılaraq sürüşmə prosesinin aktivləşməsinə səbəb olub.

  Ekologiya və Təbii Sərvətlər Nazirliyinin Geoloji Kəşfiyyat Xidmətinin rəisi Əli Əliyev deyir ki, burada texnogen amillər də nəzərə alınmalıdır: "Əgər sürüşmə prosesinin baş verməsi üçün geoloji şərait əlverişlidirsə, prosesin sürətlənməsi, dinamikasında texnogen faktorlar da rol oynayır".

Xidmət rəisi deyir ki, burada mövcud 2 qoruyucu istinad divarından birincisi qırıldıqdan sonra axan kütlənin həcminin böyük olması ikinci istinad divarını da zədələyib, sürüşmə kütləsi yolu və yoldan aşağı keçərək 50-60 metrlik ərazini qapadıb.

Ə.Əliyev hesab edir ki, proses hələ stabilləşməyib, çünki qırılma qaşındakı sərt qopmanın oturma prosesi nəticəsində asılı bir blok yaranıb, eyni zamanda sürüşmə zonasının sağ və sol kəsimlərində hələ də asılı bloklar mövcuddur.

Xidmət rəisi deyir ki, bu ərazi klassik sürüşmə ərazisi olduğu üçün mövsümi aktivləşmələr ola bilər. Ə.Əliyevə görə, təsərrüfat suları tamam kəsilərsə, prosesin inkişaf dinamikası azala bilər, əks təqdirdə proses sürətlənəcək.

Xidmət rəisi hesab edir ki, sürüşmənin əsas səbəbi araşdırılmalıdır, baş vermiş sürüşmənin səviyyəsi, həcmi müəyyən olunmalıdır.

"Yeniavaz.com" saytı "Əcnəbilər banklara 226 milyon əmanət qoyub, bir ay sonra 157 milyonunu geri götürüblər" sərlövhəli məqalədə baş verən bu hadisənin səbəblərini şərh edirlər.

Müəllif rəsmi statistik rəqəmlərə istinadən deyir ki, 2021-ci ilin yanvar ayının əvvəlinə olan məlumata görə xarici ölkə vətəndaşlarının Azərbaycan banklarındakı əmanətlərinin həcmi 126,3 milyon manat olub. Müəllif əlavə edir ki, əmanətlərin 40,4 milyon manatı milli valyutada, 85,9 milyon manatı xarici valyutada yerləşdirilib.

"2020-ci il ilin əvvəlindən ötən dövr ərzində əcnəbilərin banklardakı əmanətlərinin həcmi 8,7% və ya 12,1 milyon manat azalıb. Azalma yalnız xarici valyutada yerləşdirilən əmanətlər üzrə qeydə alınıb", deyə müəllif bildirir.

Belə ki, əcnəbilərin xarici valyutada yerləşdirdikləri əmanətlərin həcmi son bir ildə 105,1 milyon manatdan 85,9 milyon manata düşüb, manatla yerləşdirilən əmanətlər isə 33,3 milyon manatdan 40,4 milyon manata yüksəlib.

Təkcə fevral ayı ərzində əcnəbilər banklara 225,8 milyon manat əmanət qoyublar, amma sonrakı aylarda əmanətlərin həcmi azalmağa başlayıb.

Müəllif yada salır ki, mart ayının əvvəlindən Azərbaycanda COVİD 19 virusu yayılmağa başlayıb, koronavirusun yayılmağa və bu səbəbdən də məhdudiyyətlərin tətbiq olunmağa başladığı mart ayında əcnəbilər banklardan 157,2 milyon manatlıq (xarici valyutada) əmanətlərini geri götürüblər.