Qardaşının sözlərinə görə, həbsdə Qubad İbadoğluna təzyiq davam edir

Bakı/25.08.23/Turan: Demokratiya və Rifah Partiyasının sədri, iqtisadçı alim, həbs olan Qubad İbadoğluna psixoloji təzyiq davam edir. Bu barədə Turan-a onun qardaşı Qalib Toğrul bildirib.

"Kürdəxanı İstintaq Təcridxanasının administrasiyası Qubada psixoloji təzyiqləri davam etdirir. Belə ki, 33 gündür ki, gecələr onun kamerasında  işığı söndürmürlər. Bu, artıq psixoloji təzyiq deyil, fiziki işgəncədir",- o deyib. Qalib Toğrulun sözlərinə görə, İbadoğlu normal yata bilmir, bu da xəstəliyini ağırlaşdırır. Qanda şəkəri azalmır, təzyiq enmir, nəbz yüksək olaraq qalır.

Öz növbəsində, Penitensiar Xidmətdən şərh almaq mümkün olmayıb.

* İyulun 24-də Bakının Nərimanov Rayon Məhkəməsi Qubad İbadoğlunu saxta pul hazırlamaqda ittiham edərək 3 ay 26 gün müddətinə həbs edib. Azərbaycan Daxili İşlər Nazirliyindən bildiriblər ki, İbadoğlu 2016-cı ildə Türkiyədə dövlət çevrilişinə cəhddə ittiham olunan Fətullah Gülənin tərəfdarları ilə əlbirdir.

Qubad İbadoğlu ittihamları absurd hesab edərək rədd edir. Bir çox beynəlxalq təşkilatlar və rəsmi şəxslər rəsmi Bakını siyasətçini dərhal azad etməyə çağırıblar 16В06