Qarşılıqlı səfərlər edən azərbaycanlı və erməni jurnalistlərin adları açıqlanıb (yenilənib)

Bakı/23.11.19/Turan:  Ermənistan KİV bildirib ki, Azərbaycana səfər edən jurnalistlər “Şant” telekanalının şərhçisi Artyom Yerkaryan, “Mediamaks” İnformasiya Agentliyinin baş redaktoru David Alaverdiyan və Qarabağ İctimai Televiziyasının jurnalisti Eldar Elnakyandır. Onlar Bakıdan başqa Gəncəyə də gediblər.

Azərbaycandan Ermənistana və Dağlıq Qarabağa “Trend” İnformasiya Agentliyinin baş redaktoru Elçin Vəliyev,   1news.az  saytının müxbiri Elşən Rüstəmov və “Vestnik Kafkaza v Azerbaydjane” müxbiri Orxan Yolçuyevdir. 06D—

*   *   *

2019 Noyabr 23 (Şəmbə) 21:45:43

XİN erməni jurnalistlərin Azərbaycana səfərini təsdiqlədi

Bakı/23.11.19/Turan:  Noyabrın 17-21 tarixlərində Azərbaycan və Ermənistan tərəfindən  iki ölkənin KİV nümayəndələrinin səfər mübadiləsi təşkil olunub. Bu barədə Turana Xarici İşlər Nazirliyin mətbuat xidmətinin rəhbəri Leyla Abdullayeva məlumat verib. 

XİN-in sözçüsünün sözlərinə görə, səfər ATƏT-in fəaliyyətdə olan sədrinin şəxsi nümayəndəsinin ofisinin təşkilati dəstəyi ilə keçirilib. 

Abdullayeva vurğulayıb ki, səfər çərçivəsində Azərbaycan jurnalistləri Ermənistanda, eləcə də Azərbaycanın Dağlıq Qarabağ bölgəsində, o cümlədən Şuşa şəhərində olublar. "Erməni jurnalistləri azərbaycanlı həmkarları, QHT nümayəndələri, akademik dairələr, həmçinin Azərbaycanın Dağlıq Qarabağ bölgəsinin Azərbaycanlı icması ilə görüşüblər. Azərbaycanda olarkən erməni jurnalistləri, habelə müsəlman, xristian və yəhudi dini ziyarətgahlarına baş çəkiblər".--0--