“Qatil aviadaşıyıcılar” Ukraynada yaşayış binasına zərbə endiriblər

Kiyev/15.01.23/UNIAN: Dnepr şəhərində çoxmərtəbəli binaya Rusiyanın raket hücumu nəticəsində yaralananların sayı 73 nəfərə çatıb. Yanvarın 15-dən şəhərdə üçgünlük matəm elan edilib, UNIAN bildirib.

Dnepr Şəhər Şurasının məlumatına görə, şənbə günü, 14 yanvar 2023-cü ildə  Rusiyanın “Pobeda” yaşayış massivindəki evə endirdiyi zərbə nəticəsində binanın seksiyalarından biri partlayışdan tamamilə dağılıb.

“Məlum olduğu kimi, yanvarın 14-də günorta Rusiya qoşunları 1,1 mindən çox adamın yaşadığı çoxmərtəbəli binaya raket zərbəsi endirib. Partlayış nəticəsində evin seksiyalarından biri tamamilə dağılıb. Saat 07:25-ə olan məlumata görə, Dövlət Fövqəladə Hallar Xidməti dağılmış hündürmərtəbəli binadan 38 nəfəri xilas edib, onların 6-ı uşaqdır. Dağıntılar altında qalan 21 nəfər, o cümlədən bir uşaq həlak olub, 73 nəfər, o cümlədən 14 uşaq yaralanıb.

“Faciə yerində xilasedicilər, hərbçilər, şəhər xidmətləri, polis və çoxlu sayda texnika hələ də işləyir. Dağıntılar təmizlənir. Evlərinə ziyan dəymiş adamlar müvəqqəti sığınacaqlara aparmaq üçün avtobuslar təşkil olunub. Şəhər rəhbərliyi ehtiyacı olan bütün adamlara yardım göstərir" , - Şəhər Şurası əlavə edib.

Ruslar "qatil aviadaşıyıcı" kimi tanınan X-22 raketindən istifadə ediblər. O, dənizdə aviadaşıyıcı qrupları məhv etmək üçün nəzərdə tutulub və nüvə hissəsilə təchiz oluna bilər.

Ukrayna Silahlı Qüvvələri Hərbi Hava Qüvvələrinin komandanı, general-leytenant Nikolay Oleşuk bildirib ki, Ukrayna Silahlı Qüvvələrində bu cür raketləri vurmağa qadir vasitələr yoxdur.

Yanvarın 14-də Rusiya Kosmik-Hava Qüvvələrinin beş Tu-22m3 uzaqmənzilli bombardmançı təyyarəsindən Ukrayna ərazisinə beş X-22 qanadlı raket atılıb. Atışlar Kursk vilayətindən və Azov dənizi akvatoriyasından həyata keçirilib.

"Rusiyanın Ukrayna ərazisinə hərbi təcavüzü başlayandan indiyədək 210-dan çox bu cür raket atılıb. Bir dənə də olsun belə hava hücumundan müdafiə vasitələri tərəfindən vurulmayıb. X-22-ni döyüş hissəsinin kütləsi təxminən 950 kiloqramdır. Maksimum məsafə 600 kilometrə qədərdir. Uzaq məsafələrdən istifadə edildikdə hədəfdən yayınma yüzlərlə metr ola bilər.

Təkcə perspektivdə Qərb tərəfdaşlarının Ukraynaya verə biləcəyi zenit-raket kompleksləri (söhbət Patriot PAC-3 və ya SAMP-T kimi sistemlərdən gedir)  bu hava hədəflərini ələ keçirməyə qadirdir", - o deyib.

Ukrayna prezidenti Vladimir Zelenski Dnepr faciəsilə əlaqədar  axşamkı videomüraciətində deyib ki, Rusiya terrorunu ancaq döyüş meydanında dayandırmaq olar və Ukraynaya bizim tərəfdaşlarımızın anbarlarında olan və bizim döyüşçülərimizin gözlədiyi silahlar lazımdır. 

"İstəyirəm məni təkcə siyasi liderlər deyil, o adamlar eşitsinlər ki, indiyədək şübhə edirlər ki,  "bu il terrorçu dövləti məğlub etməyə kömək edəcək" silahları Ukrayaya  verməyə dəyərmi", - Zelenski deyib.