Qazaxıstanın paytaxtında Azərbaycan Ticarət Evi açılıb

Bakı/28.05.21/Turan: Respublika Günü ərəfəsində Qazaxıstanın paytaxtında Azərbaycan Ticarət Evi açılıb, xəbəri “Qazinform” BİA yayıb.

Qeyd edək ki, bundan əvvəl Bakıda Qazaxıstan Ticarət Evinin açılışı olub. Bu təşəbbüs iki dövlət arasında iqtisadi əlaqələrin möhkəmləndirilməsinə yönəlib.

“Bugünki tədbiri bayram adlandırmaq olar: mayın 28-də Azərbaycan öz dövlətçiliyinin 103 illiyini qeyd edəcək, belə əlamətdar hadisə ərəfəsində biz Azərbaycan Ticarət Evini açırıq. Bu təşəbbüsün müəllifləri hər iki ölkənin prezidentləridir. Bu, Qazaxıstanda ilk və yeganə Azərbaycan Ticarət Evidir. Biz tezliklə Aktau və Almatıda filiallar açmağı planlaşdırırıq. Gələcəkdə Qazaxıstanın bütün regionlarını əhatə etmək niyyətindəyik”, deyə Azərbaycan Respublikasının Qazaxıstanda Fövqəladə və Səlahiyyətli Səfiri Rəşad Məmmədov bildirib.

Onun sözlərinə görə, bu obyekt Qazaxıstan və Azərbaycan ixracçıları üçün yaxşı imkanlar yaradacaq. İndi Qazaxıstanlılar Azərbaycan şirniyyatını və ərzaq məhsullarını, həmçinin digər məhsulları birbaşa ala biləcəklər.

Öz növbəsində, Qazaxıstan Respublikasının energetika nazirinin müavini Aset Maqauov qeyd edib ki, “bir neçə il əvvəl biz Bakı-Tbilisi-Qars dəmiryolu xəttinin açılışının şahidi olduq.

“Bu, şübhəsiz ki, Böyük İpək Yolu ölkələrinin iqtisadi əməkdaşlığına yeni təkan verib. İki dövlət başçısı ikitərəfli ticarət dövriyyəsinin iki dəfə artırılması barədə tapşırıq verib. Ötən il Qazaxıstan və Azərbaycan arasında ticarət dövriyyəsi 170 milyon ABŞ dolları təşkil edib. Bu Ticarət Evi sayəsində qarşılıqlı ticarət dövriyyəsinin artması nəzərdə tutulur, belə ki, Azərbaycan və Qazaxıstan təkcə qardaş dövlətlər deyil, həm də strateji tərəfdaşdırlar”, deyə o bildirib.

2019-cu ilin statistik məlumatlarına görə, iki dövlət arasında qarşılıqlı ticarət dövriyyəsi  229,6 milyon dollar təşkil edib, bu, 2018-ci illə (220,54 milyon ABŞ dolları) müqayisədə 4,10% və ya 9,6 milyon ABŞ dolları çoxdur. -0-